27.09.2026 | 13:23
ԱՄՆ մեկնել զբոսաշրջային վիզայով՝ ծննդաբերելու և երեխային քաղաքացիություն ապահովելու նպատակով, չի թույլատրվում․ դեսպանություն
Ամերիկացի փորձագետը հայտնում է Ղարաբաղ գնալու համար գրանցված սիրիացի գրոհայինների մասին․ BBC
Քաղաքականություն
29.09.2020 | 20:28
Սիրիայի հարցով ամերիկացի փորձագետ Էլիզաբեթ Ցուրկովը Twitte-ի միկրոբլոգում գրել է, որ գիտի մի քանի սիրիացիների, որոնք գրանցվել են որպես վարձկաններ՝ Ղարաբաղ գնալու համար։ Այս մասին գրում է BBC-ի ռուսական ծառայությունը։
Փորձագետի խոսքով՝ Ադրբեջան նրանց ժամանման մասին փաստեր դեռ չկան։ Նա նաև գրում է, որ կարող է միայն հաստատել այն, որ թուրքամետ խմբավորումների տասնյակ գրոհայիններ Սիրիայի հյուսիս-արևմուտքից մեկնել են անհայտ ուղղությամբ։
Փորձագետը գրում է, որ նրանցից շատերը «Սիրիական ազգային բանակի» անդամներ են՝ զինված խմբավորում, որը կռվում է Սիրիայում թուրքական ղեկավարության ներքո։ Նա նաև պարզաբանում է, որ նրանց ընդդիմություն կամ ապստամբներ անվանելը սխալ է, քանի որ չի տեսել ապացույցներ, որ նրանք կռվում են Ասադի կառավարական զորքերի հետ։ Նրանց օգտագործում են «Իսլամական պետության» ահաբեկիչների ու քրդական խմբավորումների դեմ։
Բացի այդ, ըստ ամերիկացի փորձագետի, ՍԱԲ-ի հազարավոր գորհայիններ անցյալ տարեվերջից կռվում են Լիբիայում Թուրքիային սատարող իշխանամետ բանակի կողմում։ Պաշտոնապես ՍԱԲ-ը հերքում է, որ իր զինյալները կռվում են Լիբիայում ու Ղարաբաղում։
Ցուրկովը նաև, վկայակոչելով ՄԱԿ-ի զեկույցը, գրում է, որ ՍԱԲ-ի զինյալները պարբերաբար թալանում են բնակչությանը, զբաղվում մարդկանց վաճառքով, մաքսանենգությամբ, բացի այդ՝ նաև խոշտանգում իրենց բանտերում գտնվող բանտարկյալներին։
Էմմա Չոբանյան
