Օրինակ է բերվել և ԲՀԿ-ն գտել է հերոսի անունը. կոտայքցիներին որևէ մեկը չի վիրավորել. Ալեն Սիմոնյան. ՏԵՍԱՆՅՈՒԹ

Պատգամավորներ կան, որոնք մնացել են անցյալում և վերջնականապես գնալու են անցյալ: Այս մասին խորհրդարանում լրագրողների հետ զրույցում ասաց ԱԺ փոխնախագահ Ալեն Սիմոնյանը:

Հարցին՝ ինչո՞ւ է քաղաքական դիսկուրսը նման մակարդակի իջեցվել, ԱԺ փոխխոսնակը պատասխանեց՝ իր խոսքն այն բանի մասին է, որ ցանկության դեպքում յուրաքանչյուրին ցանկացած պահի կարելի է իր անցյալի հետ կապել։

«Ինչ վերաբերում է ԱԺ-ի մակարդակն իջեցնելուն, ապա ես կարծում եմ, որ կոնկրետ պատգամավորներ կան, որոնք իրենց աշխատելաոճով մնացել են անցյալում և վերջնականապես գնալու են անցյալ։ Մենք պետք է վերջնականապես հրաժարվենք նախկին բարքերից, լկտիությունից, երբ ԱԺ-ում պատգամավորներն իրենց թույլ էին տալիս լրագրողին ապտակել, վիրավորել, և հիմա պատգամավոր կոչվածն իրեն թույլ է տալիս լկտի արտահայտություններ անել դերասանի, պատգամավորների, նախարարների վերաբերյալ՝ իր ուղեղի սանդղակին համապատասխան»,- ասաց նա։

Դիտարկմանը, որ ըստ ԲՀԿ-ի՝ ԿԳՄՍ նախարար Արայիկ Հարությունյանն ԱԺ-ում ունեցած ելույթի ընթացքում մի ամբողջ մարզի բնակիչների է վիրավորել, Ալեն Սիմոնյանն արձագանքեց՝ կոտայքցիներին որևէ մեկը չի վիրավորել, դա մանիպուլյացիա է, ո՞նց կարելի է մի ամբողջ մարզի բնակիչներին վիրավորել։

«Օրինակ է բերվել, իրենք գտել են այդ հերոսի անունը և սկսել են պաշտպանել։ Ընդհանրական ասված բան էր, որ այլևս նման բարքերը Հայաստանում տեղ չունեն»,- նշեց Ալեն Սիմոնյանը:

Մանրամասները՝ տեսանյութում: