Եթե նորից անպատրաստ մոտենանք, կունենանք հերթական սիրիական ճգնաժամը․ Վարդան Մարաշլյան․ ՏԵՍԱՆՅՈՒԹ

Եթե Լիբանանից արտահոսք տեղի ունենա, ավելի ճիշտ կլինի՝ մարդիկ գան Հայաստան, քանի որ այստեղ ապրելով՝ նրանք կարող են ավելի կապված լինել Լիբանանի հետ։ «Վերադարձ Հայաստան» հիմնադրամի տնօրեն Վարդան Մարաշլյանը նման կարծիք հայտնեց այսօր կազմակերպված «Բեյրության աղետ. ինչպե՞ս աջակցել հայ համայնքին» թեմայով քննարկման ժամանակ։

«Այստեղ լինելով՝ նրանք կարող են մասնակցել Լիբանանի հայ համայնքի բոլոր կարևոր նախագծերին, որպեսզի լինեն թե՛ Հայաստանի, թե՛ Լիբանանի մաս։ Եթե գնան Ամերիկա, Կանադա, Ավստրալիա, կարելի է այդ մարդկանց մասին մոռանալ, ինչ-որ ժամանակի ընթացքում այդ մարդիկ տարբեր խնդիրների առջև են կանգնում»,- նշեց Մարաշլյանը։

Նրա խոսքով՝ պետք է լինել պրոակտիվ և կամավոր հայրենադարձություն կազմակերպել։ «Մենք չենք ասում՝ ուղղակի բոլորդ եկեք Հայաստան։ Ասում ենք՝ ձեր երեխաներից մեկին ուղարկեք Հայաստան՝ սովորելու։ Եկեք, տուն առեք Էջմիածնում, որպեսզի եթե մի բան լինի, ապրելու հիմք ունենաք, կարողանաք արագ տեղափոխվել, ավանդները դրեք հայկական բանկերում, որպեսզի ռեսուրսներ ունենաք։ Այդ դանդաղաշարժությունը եկել է թե՛ պետության, թե՛ սփյուռքի կառույցների կողմից։ Երկու կողմից էլ մենք, ցավոք, ժամանակը կորցրել ենք։ Հիմա եթե մենք նորից կանգնելու ենք ստիպված տեղափոխման հարցի առջև, համոզված եմ, որ այս գործընթացը Հայաստանի Հանրապետությունը մենակ չի կարող անել, նման գործընթացներում սփյուռքը նույնպես ֆինանսապես շատ ակտիվ պետք է մասնակցի։ Առաջարկում եմ միջնաժամկետ հատվածում սա դնենք քննարկման և լուրջ քննարկենք Հայաստան-Սփյուռք ձևաչափով։ Եթե մենք նորից անպատրաստ մոտենանք այս հարցին, կունենանք հերթական սիրիական ճգնաժամը»,- նշեց Մարաշլյանը։

Մանրամասները՝ տեսանյութում։