23.11.2024 | 20:00
Չի ներկայացվել գույքի և ունեցվածքի 509 հայտարարագիր՝ 4 տարում․ ի՞նչ է սպասվում օրինախախտներին. ՔՆՆԱՐԿՈՒՄ
ԵԱՀԿ ՄԽ համանախագահների մասնակցությամբ Մնացականյան-Բայրամով հանդիպումը կարող է տեղի ունենալ աշնանը․ ՌԻԱ Նովոստի
Քաղաքականություն
28.07.2020 | 21:52
Հայ-ադրբեջանական սահմանին տիրող իրադրության հետ կապված ԵԱՀԿ Մինսկի խմբի շրջանակում 3+2 ձևաչափով հանդիպումը (երեք համանախագահներ ՌԴ-ից, ԱՄՆ-ից և Ֆրանսիայից ու Հայաստանի և Ադրբեջանի արտգործնախարարները) կարող է տեղի ունենալ աշնան սկզբին։ «ՌԻԱ Նովոստի»-ին այս մասին հայտնել է ՌԳ ԱԳ նախարարության աղբյուրը։
«ԵԱՀԿ Մինսկի խմբի շրջանակում 3+2 ձևաչափով հանդիպումը կարող է տեղի ունենալ աշնան սկզբին, եթե երկու պետությունների միջև հարաբերություններում իրավիճակն ու կորոնավիրուսի համավարակի դինամիկան թույլ տան»,- նշել է գործակալության զրուցակիցը։
Նա, միաժամանակ, նշել է, որ ԵԱՀԿ Մինսկի խմբի շրջանակում շփումները շարունակվում են մշտական ռեժիմով։
«Հիմա գլխավոր խնդիրն իրավիճակի լիցքաթափումն է, որը բավականին լարված է մնում Ադրբեջանի և Հայաստանի սահմանին, և ԵԱՀԿ Մինսկի խմբի շրջանակում դիվանագիտական լուծման որոնման ակտիվացումը»,- հավելել է աղբյուրը։
Ինչ վերաբերում է հանդիպման հնարավոր վայրին, գործակալության զրուցակցի խոսքով՝ այն դեռևս որոշված չէ, «կարող է տեղի ունենալ՝ որտեղ ասես»:
Հավելենք, որ Էլմար Մամեդյարովի՝ Ադրբեջանի ԱԳ նախարարի պաշտոնից հեռանալուց հետո գերատեսչության նոր ղեկավար Ջեյհուն Բայրամովի համար սա հայ պաշտոնակցի ու ԵԱՀԿ ՄԽ համանախագահների հետ առաջին հանդիպումն է լինելու։
