10.09.2026 | 22:15
Ադիս Աբեբայում ներկայացվել են COP17-ի՝ ՀՀ նախագահության առաջնահերթություններն ու նախապատրաստական աշխատանքները
ԵԽ-ի կողմից ֆինանսավորվող կրթական ծրագիրը միտված է բարձրագույն կրթության ոլորտում բարեվարքության և թափանցիկության խթանմանը
Հասարակություն
30.11.2017 | 12:53
Նոյեմբերի 30-ին, Եվրոպայի խորհուրդը ՀՀ կրթության և գիտության նախարարության հետ համատեղ անցկացնելու է համաժողով նվիրված ծրագրի արդյունքներին: Այս համաժողովն իրականացվում է Եվրոպայի խորհրդի «Հայաստանի բարձրագույն կրթության համակարգում բարեվարքության ամրապնդում և կոռուպցիայի դեմ պայքար» ծրագրի շրջանակներում, որը ֆինանսավորվում է Եվրոպական միության և Եվրոպայի խորհրդի՝ 2015-2017թթ. Գործընկերություն հանուն լավ կառավարման ներքո:
Ծրագրի իրականացման երրորդ տարվա ավարտին կազմակերպված համաժողովը նպատակ ունի միավորել կրթության ոլորտի մասնագետներին և որոշում կայացնողներին, որոնք ներկայացնում են Հայաստանի և ամբողջ աշխարհի բարձրագույն կրթության ոլորտը, որպեսզի նրանք առավել հանգամանալից դիտարկեն ձեռք բերված արդյունքները, խորհեն ստացված դասերի շուրջ:
Ծրագիրը սևեռված էր՝ (i) դրամաշնորհառու կազմակերպությունների կողմից բարձրագույն կրթության ոլորտում բարեվարքության և թափանցիկության խթանմանն ուղղված միկրո ծրագրերի իրականացմանը և (ii) էթիկական չափորոշիչների կիրառման ու թափանցիկության և հաշվետողականության մեխանիզմների զարգացման ոլորտում բարձրագույն կրթության հաստատությունների և դրանց անձնակազմերի կարողությունների զարգացմանը։ Միկրո ծրագրերի շրջանակում իրականացված միջոցառումները ներառում էին հանրային իրազեկման ռազմավարության մշակման նախաձեռնություններ, բարձրագույն կրթության ոլորտում կոռուպցիայի կանխարգելման քարոզարշավներ և կրթության ոլորտում խարդախությունների բացահայտմանն ուղղված քաղաքականության առաջարկներ։ Վերապատրաստման մի շարք դասընթացներ և իրազեկող միջոցառումներ են կազմակերպվել համալսարանների կառավարման օղակների և ակադեմիական անձնակազմերի համար՝ տիպային էթիկայի կանոնագրքի ստեղծման, կոռուպցիայի, կաշառակերության և բարեվարքության կանոնակարգմանն ուղղված կանոնների և ընթացակարգերի մշակման, ուսումնական ծրագրերի մշակման և ուսանողների գնահատման ոլորտներում հաշվետողականության ու թափանցիկության բարելավման նպատակով։
Համաժողովը հնարավորություն կընձեռի նաև տարածել գործնական նյութեր և կդառնա Հայաստանի և Եվրոպայի տարբեր բարձրագույն ուսումնական հաստատությունները ներկայացնող՝ կրթության ոլորտի շահագրգիռ կողմերի միջև փորձի փոխանակման և համագործակցության հարթակ:
