30.04.2024 | 21:37
Լևոն Քոչարյանի օգնականից մինչև «սպեցնազ». լրագրողների նկատմամբ բռնությունների ահազանգերն աճում են. ՏԵՍԱՆՅՈՒԹ
ԱԺ կայքից ենք իմացել. որևէ տարաձայնություն չի եղել․ ԲՀԿ-ական պատգամավորները՝ խմբակցությունից Սերգեյ Բագրատյանի հեռանալու մասին
Քաղաքականություն
23.07.2020 | 17:30
Ազգային ժողովի «Բարգավաճ Հայաստան» խմբակցության պատգամավորներ Նաիրա Զոհրաբյանն ու Արման Աբովյանը տեղյակ չեն եղել, որ պատգամավոր Սերգեյ Բագրատյանը պատրաստվում է դուրս գալ ԲՀԿ խմբակցությունից։ Այս մասին նրանք նշեցին Factor.am-ի հետ զրույցում։
«Չեմ կարող մեկնաբանել, քանի որ մենք պարոն Բագրատյանի հետ որևէ խնդիր չենք ունեցել, մշտապես եղել են նորմալ աշխատանքային, ընկերական հարաբերություններ։ Որևէ տարաձայնություն որևէ պատգամավորի կամ Գագիկ Ծառուկյանի և պարոն Բագրատյանի միջև չի եղել։ Վերջին 1 ամսվա ընթացքում մենք նրան չենք տեսել, ուստի ինչպես Դուք, մենք ևս պարոն Բագրատյանի՝ ԲՀԿ խմբակցությունից դուրս գալու դիմումից տեղեկացել ենք Ազգային ժողովի պաշտոնական կայքից։ Կարծում եմ՝ մեկնաբանություն պետք է տա Սերգեյ Բագրատյանը»,- նշեց Նաիրա Զոհրաբյանը։
Նույն խմբակցության պատգամավոր Արման Աբովյանը ևս տեղյակ չէ Սերգեյ Բագրատյանի որոշման և դրա պատճառների մասին․ «Ոչ մի տարաձայնություն, ոչ մի խնդիր չի եղել, նույնիսկ քննարկումներ չեն եղել։ Նախապես տեղյակ չեն եղել նման բանի մասին»,- ասաց պատգամավորը։
Նշենք, որ Factor.am-ը փորձեց կապ հաստատել պատգամավոր Սերգեյ Բագրատյանի հետ, սակայն վերջինը չպատասխանեց մեր հեռախոսազանգերին։
Հիշեցնենք՝ Ազգային ժողովի մամուլի ծառայությունն այսօր տեղեկացրել է, որ «Բարգավաճ Հայաստան» խմբակցության պատգամավոր Սերգեյ Բագրատյանը դուրս է գալիս խմբակցությունից։
Անժելա Պողոսյան
