Քաղաքականություն
07.07.2020 | 19:39
Ողջունելի է Սպիտակ տան մամուլի խոսնակի կողմից համապատասխան բառամթերքի օգտագործումը։ Այդ մասին Factor.am-ի հետ զրույցում ասաց իշխող «Իմ քայլը» խմբակցության պատգամավոր Տաթև Հայրապետյանը՝ խոսելով Սպիտակ տան մամուլի խոսնակի կողմից Հայոց ցեղասպանություն եզրույթը կիրառելու մասին։
«Կարծում եմ՝ Հայոց ցեղասպանության ճանաչման համար այս երկար ժամանակահատվածում նույն ԱՄՆ-ում մեր տարբեր շահագրգիռ կողմերի առաջ քաշած նպատակային պայքարն, իհարկե, պետք է տա իր ցանկալի արդյունքը։ Եվ նախորդ տարին աչքի ընկավ ճանաչման կարևոր ակտերով։ Կարծում եմ՝ այդ գործընթացը, իհարկե, պետք է լինի շարունակական և միայն ողջունելի է, որ դա տեղ է գտել նաև մամուլի խոսնակի խոսքում»,- ասաց Հայրապետյանը։
Իսկ արդյոք սա կարո՞ղ էր պատահականություն լինել՝ պատգամավորն արձագանքեց. «Պատահականության խնդիր չկա, կա արդարություն, որի ճանաչման համար երկարատև պայքար է մղվել և դա պետք է տա իր արդյունքները»։
Հիշեցնենք, որ Սպիտակ Տան մամուլի խոսնակ Քեյլի Մաքենեյնին ժամեր առաջ հայտարարել էր, որ ԱՄՆ-ում վանդալիզմի զոհ է դարձել Հայոց ցեղասպանության հուշարձանը։
Մերի Մարտիրոսյան
