Մահվան ելքով պատահարները նվազել են, խուլիգանության դեպքերը՝ ավելացել

Այս տարվա հունվար-մայիս ամիսներին ճանապարհային երթևեկության և տրանսպորտային միջոցների շահագործման կանոնները խախտելու 477 դեպք է գրանցվել, ինչը 14,8 տոկոսով պակաս է նախորդ տարվա նույն ժամանակահատվածում գրանցված 548 դեպքի համեմատ։ Այս մասին տեղեկանում ենք ՀՀ վիճակագրական կոմիտեի հրապարակած տվյալներից։

Նվազել են նաև մահվան ելքով պատահարները։ Այս տարվա առաջին հինգ ամիսներին ճանապարհային երթևեկության և տրանսպորտային միջոցների շահագործման կանոնները խախտելու հետևանքով գրանցվել է մահվան 65 դեպք, նախորդ տարի՝ 89։ Սա նաև կարող է պայմանավորված լինել մարտի 16-ից երկրում հայտարարված արտակարգ դրությամբ, որի սկզբնական՝ առաջին փուլում գործում էին  նաև  տեղշարժման խիստ սահմանափակումներ։

Պետական իշխանության, ծառայության և կառավարման կարգի դեմ ուղղված հանցագործությունների թիվը ևս նվազել է՝ 2020-ի հունվար-մայիս ամիսներին կազմելով 1279 դեպք՝ նախորդ տարվա 1433-ի փոխարեն։

Այս տարվա առաջին 5 ամիսներին  ավելացել են խուլիգանության դեպքերը։ Այսպես․ 2020 թվականի առաջին հինգ ամիսներին գրանցվել է 132 խուլիգանության դեպք, որից 43-ը՝ զենքի գործադրմամբ, իսկ նախորդ տարվա նույն ժամանակահատվածում 113 դեպք, որից 30-ը՝ զենքի գործադրմամբ։

Աճ է գրանցվել սեփականության դեմ ուղղված հանցագործությունների տվյալներում։ Այս տարի գրանցվել է 5643 դեպք, նախորդ տարի՝ 5385։

Տնտեսական գործունեության դեմ ուղղված հանցագործությունները նույնպես աճել են։ 2020-ին դրանց թիվը կազմում է 322, իսկ 2019-ին՝ 268։

Հանցագործությունների ընդհանուր քանակից` կոռուպցիոն բնույթի հանցագործությունների թիվը գրեթե նույնն է․ 2020-ին այն կազմել  է 549, իսկ 2019-ին՝ 556 դեպք։