Մեր 20 հազար դեպքը, ասենք, մեր, իմ սխալի պատճառով է, բա աշխարհի 10 մլն դեպքն ո՞ւմ սխալի պատճառով է․ վարչապետը՝ շահարկումների մասին. ՏԵՍԱՆՅՈՒԹ

Պարետատան այսօրվա նիստից հետո հրավիրված ճեպազրույցում պատասխանելով դիտարկմանը, թե ժամանակ առողջապահության նախարարն ասում էր՝ դիմակ կրելն անօգուտ է, իսկ հիմա Կառավարությունը դժգոհում է քաղաքացիների այն վարքագծից, որը ձևավորվել է գործադիր մարմնի անդամների հայտարարությունների արդյունքում, ՀՀ վարչապետ Նիկոլ Փաշինյանն ասաց՝ այդ տեսակետը ոչ թե Հայաստանի առողջապահության ոլորտի թիվ պատասխանատուի կողմից է հնչեցվել, այլ աշխարհի առողջապահական ոլորտի թիվ մեկ պատասխանատու կազմակերպության։

«Ի սկզբանե եղել է այսպիսի դիրքորոշում, որ դիմակ պետք է կրեն հիվանդները և նրանց խնամողները, որովհետև դիմակը պաշտպանում է ոչ թե վարակվելուց, այլ վարակելուց։ Եվ սա եղել է Առողջապահության համաշխարհային կազմակերպության արձանագրումը»,- հավելեց նա։

Վարչապետի խոսքով՝ հետո որոշակի գիտելիք և իրավիճակ է փոխվել, և հիմա ինքներս մեզ պետք է որպես վարակակրի վերաբերվենք։

«Կար նաև երկրորդ խնդիրը։ Երբ մենք ասում ենք՝ ժողովուրդ ջան, դիմակ կրեք, իսկ խանութներում և դեղատներում դիմակ չկա, հարց չի՞ առաջանում՝ այդ ինչ կոչ է։ Չկա դիմակ ֆիզիկապես։ Դրա համար պետք էր նաև դիմակների սպառումը զսպել, որպեսզի գոնե հիվանդանոցներում բժիշկները կարողանան դիմակ ունենալ»,- ասաց նա։

Նիկոլ Փաշինյանի խոսքով՝ աշխարհում այսօր կորոնավիրուսով վարակի 10 միլիոնից ավելի դեպք է արձանագրվել։ «Լավ, Հայաստանում Առողջապահության նախարարությունը, ենթադրենք, սխալ հայտարարություն է արել, բա աշխարհի մնացած երկրներո՞ւմ ովքեր են սխալ հայտարարություն արել։ Համաճարակն այսօր աշխարհում ծավալվում է, ո՞ւմ սխալ հայտարարության, ո՞ւմ չարած գործողության արդյունքում է այդ վարակը տարածվել․․․ Այստեղ խնդիրը պետք է հասկանանք, քաղաքական շահարկումների տրամաբանությունից դուրս գանք։ Մենք ունենք 20 հազար դեպք, և դա տեղի է ունեցել, ենթադրենք, տեղի է ունեցել մեր, իմ սխալի պատճառով։ Բա աշխարհի 10 մլն դեպքն ո՞ւմ սխալի պատճառով է»,- ասաց վարչապետը։

Մանրամասները՝ տեսանյութում։