Արմեն Գևորգյանի հայրը ցուցմունք չի տվել, մեղադրանքը չի ընդունում․ պաշտպան

Այսօր Հատուկ քննչական ծառայությունը հայտնեց, որ նախկին փոխվարչապետ Արմեն Գևորգյանի հորը մեղադրանք է առաջադրվել․ «Անդրանիկ Գևորգյանին ՀՀ քրեական օրենսգրքի 190-րդ հոդվածի 3-րդ մասի 1-ին կետով մեղադրանք է առաջադրվել հանրորեն վտանգավոր այն արարքի կատարման համար, որ նա թաքցրել և խեղաթյուրել է որդու` ՀՀ նախագահի աշխատակազմի ղեկավարի պաշտոնը զբաղեցրած Արմեն Գևորգյանի կողմից ստացած կաշառքի գումարի իրական բնույթն ու ծագումը և օրինականացրել առանձնապես խոշոր չափերի՝ 309.000.000 ՀՀ դրամին համարժեք 1.000.000 ԱՄՆ դոլարը»։

Նրա նկատմամբ ընտրվել է ստորագրությունը չհեռանալու մասին խափանման միջոցը։

Factor.am-ի հետ զրույցում Անդրանիկ Գևորգյանի պաշտպան Էրիկ Ալեքսանյանը հայտնեց, որ Գևորգյանը հրաժարվել է ցուցմունք տալուց, իսկ առաջադրված մեղադրանքը չի ընդունում․ «Միանշանակ համարում ենք, որ անհիմն մեղադրանք է, տարակուսելի է նաև այն, որ փաստական հանգամանքները, որոնց հիման վրա մեղադրանք են առաջադրել պարոն Գևորգյանին, ՀՔԾ-ին հայտնի էին նաև այն ժամանակ, երբ Արմեն Գևորգյանի գործի նախաքննությունը կատարում էր ՀՔԾ-ն։ Հետևաբար՝ հարց է առաջանում՝ ինչո՞ւ դեռ այն ժամանակ չեն մեղադրանք առաջադրել Անդրանիկ Գևորգյանին, չնայած որ ժամանակահատվածում էլ, որ մեղադրանք առաջադրեին, միևնույնն է, այն շարունակելու էր մնալ ապօրինի։ Պնդում ենք, որ մեղադրանքը իրականության հետ որևէ առնչություն չունի, ո՛չ վերագրվող արարքը, ո՛չ էլ որևէ այլ հանցագործություն պարոն Գևորգյանը չի գործել»,- ասաց փաստաբանը։

Հավելենք, որ Արմեն Գևորգյանը մեղադրվում է սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու համար: Նա ևս իրեն առաջադրված մեղադրանքները չի ընդունում։

Լիլիթ Շաբոյան