28.11.2024 | 14:53
ԲԴԽ նախագահը մի SMS-ով փախավ պաշտոնից. Ռոբերտ Քոչարյան․ ՏԵՍԱՆՅՈՒԹ
ՆԱՏՕ-ն պատրաստվում է համաճարակի երկրորդ ալիքին
Քաղաքականություն
06.06.2020 | 22:00
ՆԱՏՕ-ի ղեկավարությունը քայլեր է ձեռնարկում՝ նախապատրաստվելով կորոնավիրուսային համաճարակի երկրորդ ալիքին։ Այս մասին հայտարարել է Հյուսիսատլանտյան դաշինքի ղեկավար Յենս Ստոլտենբերգը, գրում է DW-ի ռուսական ծառայությունը։
Նրա խոսքով՝ նպատակը կորոնավիրուսի երկրորդ ալիքի դեմ համակարգված համատեղ պայքար ծավալելն է։
«Մենք պետք է համաձայնեցնենք մեր գործողությունների պլանավորումը, որպեսզի կարողանանք ավելի արագ ու ավելի լավ աջակցել ՆԱՏՕ-ի անդամներին ու գործընկեր երկրներին, որոնք սերտորեն կապված են դաշինքի հետ»,- ասել է Դաշինքի ղեկավարը։
Ստոլտենբերգը հայտնել է, որ նախատեսվում է կենտրոնացնել բավարար ռեսուրսներ՝ բժշկական սարքավորումների արագընթաց տեղափոխման համար։ Մոտ ժամանակներս պլանի նախապատրաստական աշխատանքը կավարտվի, և հունիսի կեսերին այն կներկայացվի Դաշինքի պաշտպանության նախարարների վիրտուալ համաժողովի ժամանակ։
Կորոնավիրուսային համաճարակի հենց սկզբից ՆԱՏՕ-ի ուժերը ավելի քան 100 գործողություն են կատարել՝ Դաշինքի ու գործընկեր երկրներին աջակցելու համար։ Խոսքը բժշկական անձնակազմի և հիվանդների, դաշտային հիվանդանոցների ու բժշկական պաշտպանիչ սարքավորումների անհապաղ փոխադրման մասին է։
