08.11.2024 | 22:44
Ստամբուլի ընդդիմադիր քաղաքապետը հերքել է իշխանությունների կողմից իր պաշտոնանկության հնարավորությունը
Բրիտանացի արքեպիսկոպոսը Լոնդոնի հիվանդանոցներից մեկում գաղտնի կամավորություն է արել
Քաղաքականություն
13.05.2020 | 21:53
Մեծ Բրիտանիայի Քենթերբերի քաղաքի արքեպիսկոպոս Ջասթին Ուելբին, բժշկի կերպարի ներքո թաքնված, Լոնդոնի կենտրոնում գտնվող Սուրբ Թովմաս հիվանդանոցի հիվանդների համար կամավորություն է արել՝ եկեղեցական հագուստի վրայից հատուկ բժշկական համազգեստ հագնելով։ Այս մասին հայտնում է The Guardian-ը։
Պարբերականի փոխանցմամբ՝ արքեպիսկոպոսը, այլ հոգևորականների հետ, հիվանդանոցում կամավորություն է արել դեռ կարանտինի սկզբնական շրջանից՝ աղոթելով բուժում ստացողների և մահացողների համար։
«Այդպես նա հանգստանում է: Կարանտինի ժամանակ մարդկանց ֆիզիկապես տեսնելը և նրանց հետ աղոթելն այն է, ինչ հոգևորականությունն անում է ամբողջ երկրով մեկ։ Անձնական ռիսկ կա, սակայն նա այդ մասին չի մտածում։ Նա պարզապես կարծում է, որ սա այն է, ինչ քրիստոնյաները պետք է անեն»,- Guardian-ին հայտնել է արքեպիսկոսին մոտ կանգնած աղբյուրը։
Պարբերականի փոխանցմամբ՝ Սուրբ Թովմաս հոսպիտալում Մեծ Բրիտանիայի վարչապետ Բորիս Ջոնսոնն էր բուժում ստանում։ Նա, հիշեցնենք, վերջերս է կորոնավիրուսից ապաքինվել։
The Telegraph-ի տեղեկություններով էլ՝ արքեպիսկոպոս Ուելբին այս հոսպիտալ սկսել է այցելել այն բանից հետո, երբ Բորիս Ջոնսոնը դուրս է գրվել։ Նշվում է նաև, որ Մեծ Բրիտանիայում որոշ հոգևորականներ քննադատաբար են մոտեցել այն հարցին, թե ինչպես են եկեղեցական առաջնորդներն արձագանքել կորոնավիրուսային ճգնաժամին։
Հավելենք՝ Մեծ Բրիտանիայում, վերջին տվյալներով, կորոնավիրուսի 229 հազարից ավելի հաստատված դեպք և 33 հազարից ավելի մահ կա։ Մահվան ելքերով Մեծ Բրիտանիան եվրոպական երկրների շարքում առաջատարն է։
Նելլի Մելքոնյան
