Սահմանադրական դատարանի անսպասելի որոշումը. ի՞նչ կփոխվի Վանաձորի ավագանիում

Սահմանադրական դատարանն այսօր բավարարեց «Լուսավոր Հայաստան»-ի դիմումը՝ Վանաձոր համայնքի ավագանու գումարած բոլոր նիստերը ճանաչելով հակասահմանադրական:

 «2017թ. մարտի 31-ին կայացրած որոշումները կորցնում են իրենց իրավական ուժը մինչև 2018թ. մարտի 31-ը»,- հայտարարեց Սահմանադրական դատարանի նախագահ Գագիկ Հարությունյանը՝ շարունակելով. «Յուրաքանչյուր ներկայացուցչական մարմին,՝լինի խորհրդարան, թե համայնքի ավագանի, որոշումներ ընդունելիս պետք է առաջնորդվի բացառապես իրավական և ժողովրդավարական պետության սկզբունքներով, գործունեությունն իրականացնի այնպես, որ հանրային իշխանության կոլեգիալ մարմնում Սահմանադրությամբ սահմանաված քվորումի հիման վրա որոշումներն ընդունվեն բազմակարծության երաշխավորման ու տվյալ մարմնի իրավազորության առկայության պայմաններում»:

«Այդ նիստերի ընթացքում կայացրած որոշումները իրավական ուժ չունեն, հետևաբար մանդատագողությամբ ձևավորված փոքրամասնության քաղաքապետը ապօրինություն է գործում շուրջ մեկ տարի», – որոշման հրապարակումից հետո լրագրողների հետ զրույցում հայտարարեց «Լուսավոր Հայաստան» կուսակցության նախագահ Էդմոն Մարուքյանը՝ ընդգծելով, որ գնդակն այժմ իշխանության դաշտում է, և իրենք պետք է որոշում կայացնեն. շարունակո՞ւմ են ապօրինությունները, թե՞ ոչ:

«Մեր պահանջն ամբողջությամբ բավարարված է, սակայն որոշումն ուժի մեջ կմտնի մարտի 1-ին, դա իրավական պետության կարևոր սկզբունքներից մեկն է: Մենք կուսումնասիրենք փաստաթուղթը, և մեր հետագա քայլերը կծրագրենք»,-  գործընկերոջ խոսքը շարունակեց  Աժ «Ելք» խմբակցության պագամավոր Արտակ Զեյնալյանը:

Հիշեցնենք՝ 2016 թվականի հոկտեմբերի 2-ին Վանաձորում կայացած ընտրություններից հետո ավագանու «Լուսավոր Հայաստան», ԲՀԿ և «Հայկական վերածնունդ» խմբակցությունները բոյկոտեցին ավագանու նիստերը: Թեև նրանք նիստերին չէին մասնակցում, սակայն Վանաձորի քաղաքապետ Մամիկոն Ասլանյանը մինչ օրս ավագանու նիստեր է գումարել՝ պնդելով, որ  անօրինական ոչ մի բան չեն անում:

Ազգային ժողովի «Ելք» և «Ծառուկյան» խմբակցությունների 26 պատգամավորները Սահմանադրական դատարանից պահանջում էին անվավեր ճանաչել ՀՀ «Տեղական ինքնակառավարման» մասին օրենքի այն դրույթը, որով ավագանու ՀՀԿ և ՀՅԴ խմբացկությունների ներկայացուցիչները՝ լինելով փոքրամասնություն և չունենալով քվորում, գումարում են նիստեր ու կայացնում որոշումներ։

«Սահմանադրական դատարանի որոշումը վերաբերում է օրենքի հակասահմանադրականությանը և դրանից բխող մեր կայացրած նիստերին: Ես օրենքը կիրառել եմ ճիշտ, բայց հիմա գտնում են, որ այդ օրենքը հակասահմանադրական է: Հիմա մինչև մարտի 31-ը ժամանակ է տրվել, որպեսզի Ազգային ժողովը փոփոխություններ կատարի», – Factor.am-ի հետ զրույցում մեկնաբանելով ՍԴ-ի որոշումն՝ ասաց Վանաձորի քաղաքապետ Մամիկոն Ասլանյանը:

Մեր հարցին՝ մինչև մարտի 31-ը պատրաստվո՞ւմ են նիստեր գումարել, Վանաձորի քաղաքապետը պատասխանեց. «Որոշումն ամբողջական չենք ստացել, որ հասկանանք, ուստի ստանանք , այն ժամանակ էլ կմեկնաբանենք»: