15.12.2025 | 11:22
Ծիծեռնակաբերդի խճուղու հիմնական փլուզված հատվածը վերականգնվել է․ քաղաքապետարանի պաշտոնյա. ՏԵՍԱՆՅՈՒԹ
Հայաստանում օլիգարխները հիասթափվելու կամ դժգոհելու առիթ դեռ չունեն. Արտավազդ Բայաթյան
Քաղաքականություն
22.04.2020 | 22:37
«Կարծում եմ՝ Հայաստանում օլիգարխները հիասթափվելու կամ դժգոհելու առիթ դեռ չունեն. գուցե միայն կաշկանդվում են, որ իրենց զգալի մասը նախկինում նաև քաղաքական գործունեությամբ էր զբաղված, իսկ հիմա շատերին դուրս են թողել քաղաքական դաշտից, ասել են՝ գնացեք-զբաղվեք ձեր բիզնեսով»,- Factor.am-ի հետ զրույցում նման տեսակետ հայտնեց երգիչ, երգահան Արտավազդ Բայաթյանը:
Նշենք, որ ՀՀ վարչապետ Նիկոլ Փաշինյանն օրերս ֆեյսբուքյան ուղիղ եթերում անդրադարձել էր Հայաստանում հիասթափվածների առկայությանը: Փաշինյանի խոսքով՝ հիասթափված են նաև օլիգարխները, որոնք հեղափոխության արդյունքում զրկվել են իրենց արտոնություններից:
Երգչի համոզմամբ՝ Հայաստանում օլիգարխները զրկված են նախկինում ունեցած մի շարք հնարավորություններից, բայց դա չի նշանակում, թե նրանց փողը, այդ թվում՝ ապօրինի կերպով ձեռք բերված գումարը, պակասել է:
«Օրենքի ուժը դեռ նրանց չի հասել: Դա արագ իրականացվող գործընթաց չէ. զարգացած երկրները շատ երկար ճանապարհ են անցել՝ դրան հասնելու համար»,- նկատեց մեր զրուցակիցը:
Ըստ Փաշինյանի` հիասթափվածների թվում են նաև կոռուպցիոն համակարգի մաս հանդիսացողները, որոնց այսօր կաշառքի ու կոռուպցիայի պահին բռնում են, մինչդեռ նախկինում նրանք համոզված էին, որ իրենց չեն բռնի:
«Ճիշտ է, արդեն երկու տարի է՝ Հայաստանում համատարած կոռուպցիա առկա չէ, բայց դա չի նշանակում, թե Հայաստանում առհասարակ, կոռուպցիա չկա: Այդպիսի բան չի էլ կարող լինել: Նախ՝ մեր պետական համակարգերում, ներքին օղակներում շատերը չեն փոխել իրենց գործելաոճը, բացի այդ՝ հասարակ քաղաքացիներից շատերը դեռ այսպես են մտածում. «Այ մարդ, դե առաջ լավ էր էլի, փողը տալիս էի, գործերս առաջ էր գնում»:
Պետք է նախ և առաջ ազատվել այս մտայնությունից»,- եզրափակեց երգիչը:
Աննա Բաբաջանյան
