14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Հայաստանը պետք է հակաքայլերի դիմի. Ռուբեն Մեհրաբյանը՝ գազի գինը բարձրացնելու հայտի մասին
Քաղաքականություն
07.04.2020 | 21:13
Գազի գնի հետ կապված Ռուսաստանի քայլերն այլ կերպ, քան քաղաքական, հնարավոր չէ գնահատել, դրանք հիմքում հստակ քաղաքական շարժառիթներ ունեն: Factor.am-ի հետ զրույցում անդրադառնալով ռուսական գազի գինը բարձրացնելու հարցով «Գազպրոմ Արմենիա»-ի կողմից հայտ ներկայացնելուն՝ ասաց քաղաքական մեկնաբան Ռուբեն Մեհրաբյանը:
«Ռուսական կողմի այս առաջարկը, փաստորեն, պատասխանն է հայկական կողմի բարձրացրած հարցի, որ հաշվի առնելով նավթի գների տոտալ անկումը՝ ուղղակի անտրամաբանական է, որ ռուսական գազը Հայաստանի համար արժենա ոչ շատ ավելի թանկ, քան Եվրոպայում է, և դրա անունն էլ չդրվի զեղչ, դաշնակցային, գործընկերային հարաբերություն կամ ԵՏՄ շրջանակում արվող քայլ»,- նշեց Մեհրաբյանը:
Նրա կարծիքով՝ հայկական կողմի բարձրացրած հարցը տրամաբանական էր. «Բայց մենք ստացանք խիստ քաղաքականացված և բավականին լկտի պատասխան, որ մի բան էլ գինը կբարձրացնենք»:
Երևանը հայտարարել է, որ պատրաստվում է գազի գնի շուրջ բանակցել ռուսական կողմի հետ՝ դրա նվազման ակնկալիքով: Ռուբեն Մեհրաբյանն ասում է՝ հայկական կողմը որևէ անօրինական բան չի ուզում:
«Եթե ռուսական գազի գինն իջել է ընդհանրապես, ապա Հայաստանի համար էլ պետք է իջնի մասնավորապես: Եվ հիմա հայկական կողմը հույսը դնում է ռուսական կողմի սթափ տրամաբանության վրա, որ հարցը կլուծվի ոչ թե ամբիցիաներից դրդված, այլ հաշվիչի թվերից ելնելով»,- ասաց նա:
Իսկ եթե «Գազպրոմ»-ը, այնուամենայնիվ, բարձրացնի գազի գինը, ըստ Ռուբեն Մեհրաբյանի, Հայաստանը պետք է հակաքայլերի դիմի: Նա, սակայն, չմանրամասնեց, թե ինչ հակաքայլերի մասին է ակնարկում:
«Հայ-ռուսական հարաբերությունները բավական բարդ են, և ռուսական կողմը չպետք է մոռանա, որ Ռուսաստանը մեզ պետք չէ ավելի, քան Հայաստանն է պետք իրենց: Եվ ռուսական սկզբունքը՝ «ինչ եք անելու առանց մեզ», նաև իրենց է վերաբերվում: Կարծում եմ՝ հայկական կողմը բոլոր հնարավորություններն ունի՝ նման հարթության վրա երկխոսություն վարելու և Հայաստանի շահերից բխող որոշումների հասնելու համար»,- ասաց նա:
Ստեղծված իրավիճակը, սակայն, քաղաքական մեկնաբանի կարծիքով, պետք է մեզ դրդի՝ փոխել էներգետիկ անվտանգության հետ կապված մեր ռազմավարությունը:
«Սա ևս մեկ անգամ ցույց է տալիս, թե մեզ ինչ կրակի մեջ են գցել մեր նախկին իշխանությունները՝ ռուսական կողմին այսքան առավելություններ ու հնդկական կովի կարգավիճակին հասնող արտոնություններ տալով, որի պտուղներն էլ մենք հիմա ենք քաղում: Հայկական կողմը պետք է ինտենսիվացնի բանակցությունները իրանական կողմի հետ՝ փորձելով դիվերսիֆիկացնել գազամատակարարումները, մյուս կողմից էլ՝ հայկական կողմը ջանք ու եռանդ չպետք է խնայի՝ վերականգնվող էներգետիկան զարգացնելու ուղղությամբ»,- եզրափակեց նա:
