16.12.2025 | 13:20
Թրամփը դատի է տվել BBC-ին` պահանջելով 5 մլրդ դոլար
Փաշինյանն ու Լուկաշենկոն քննարկել են գազի բարձր գինը՝ նշելով, այն չի համապատասխանում համաշխարհային մակարդակին
Տնտեսություն
31.03.2020 | 16:26
Հայկական կողմի նախաձեռնությամբ այսօր տեղի ունեցած հեռախոսազրույցում Հայաստանի վարչապետ Նիկոլ Փաշինյանն ու Բելառուսի նախագահ Ալեքսանդր Լուկաշենկոն քննարկել են ստեղծված դժվարին իրավիճակում տնտեսության գործունեությանն առնչվող հարցեր՝ նշելով գոյություն ունեցող լուրջ խնդիրներն ու դժվարությունները: Այս մասին տեղեկանում ենք Բելառուսի նախագահի մամուլի ծառայությունից:
Հաղորդագրության համաձայն՝ կողմերը կարծիքներ են փոխանակել ածխաջրածինների գների վերաբերյալ, որոնք և՛ Բելառուսը, և՛ Հայաստանը ներկրում են Ռուսաստանից:
Ալեքսանդր Լուկաշենկոն ու Նիկոլ Փաշինյանը շեշտել են բնական գազի գնի բարձր մակարդակը՝ նշելով, որ այն չի համապատասխանում համաշխարհային մակարդակին և ստեղծված իրավիճակին ընդհանրապես:
Խոսակցության առանձին թեմա է եղել առողջապահության համակարգերի գործունեություն և սեզոնային սուր վարակների տարածմանը հակազդելու հարցը:
Ստեղծված իրավիճակով պայմանավորված՝ Հայաստանի վարչապետն ու Բելառուսի նախագահը քննարկել են նաև ԵՏՄ անդամ պետությունների ղեկավարների հանդիպման հնարավորությունը՝ ստեղծված տնտեսական մարտահրավերները քննարկելու նպատակով: Նման հանդիպում անցկացնելու նախաձեռնությամբ հանդես է եկել Ալեքսանդր Լուկաշենկոն՝ որպես ԵՏՄ-ում նախագահող երկրի ղեկավար: Նա ընդգծել է, որ առկա են մի շարք հրատապ հարցեր, որոնք բարձր մակարդակով մանրամասն քննարկելու անհրաժեշտություն կա:
Ի դեպ, նշենք, որ ՀՀ վարչապետի աշխատակազմի մամուլի ծառայության հրապարակած հաղորդագրության մեջ նշված չէ երկու երկրների առաջնորդների կողմից գազի բարձր գինը քննարկելու մասին:
