Գյումրիի տարեցների տուն-ինտերնատում խիստ սահմանափակվել է ելումուտը. կանխարգելիչ միջոցառումներ են իրականացվում

Կորոնավիրուսով վարակվելու ամենախոցելի խումբը տարեցներն են, և Հայաստանում նրանց վարակից պաշտպանելու համար տարբեր միջոցներ են ձեռնարկվում:

Գյումրիի տարեցների տուն-ինտերնատում նույնպես կանխարգելիչ միջոցառումներ են իրականացվում։ Հայաստանում արտակարգ դրություն հայտարարելուց հետո տուն-ինտերնատում խստացվել է սանիտարահիգիենիկ վերահսկողությունը, կատարվում են ախտահանիչ գործողությունններ, ձեռք են բերվել բոլոր անհրաժեշտ նյութերը։

«Ամեն առավոտ պարտադիր ստուգում են աշխատակիցների ջերմությունը, ախտահանվում են ձեռքերը, այնուհետ անցնում են աշխատանքի։ Օրվա ընթացքում էլ, բնական է, դիմակ, ձեռնոց են կրում, անընդհատ ալկոգելերի ու ալկոսփրեյների միջոցով ախտահանման աշխատանքներ են իրականացվում»,- Factor.am-ի հետ զրույցում ասաց Գյումրիի տուն-ինտերնատի տնօրենի ժամանակավոր պաշտոնակատար Արմեն Սարուխանյանը։

Բացի այդ, նրա խոսքով, խիստ սահմափակումներ կան այցերի հետ կապված, ելումուտը նվազագույնի է հասցված:

«Պարզապես շփումը դրսի հետ, այսինքն՝ հարազատների, այլ քաղաքացիների այցերը, հնարավոր նվազագույնի է հասցվել, եթե ոչ ամբողջությամբ արգելվել: Եվ իրենց դուրս գալը, շփումն արգելված է՝ հնարավոր մինիմումի սահմաններում»,- ասաց Արմեն Սարուխանյանը։

Տնօրենը ուրախությամբ ընդգծեց, որ տուն-ինտերնատի աշխատակիցների ու 156 շահառուների շրջանում հիվանդացության դեպքեր չկան, անհրաժեշտ կանխարգելիչ նյութերն էլ ձեռք են բերվել ոչ թե պետական միջոցներով, այլ բարերարի աջակցությամբ։

«Անհայտ բարեգործը, բացարձակապես անսպասելի, մեր հաշվեհամարին գումար էր փոխանցել, խնդրեցինք նախարարությանը, թույլատրվեց այդ գումարի շրջանակում ձեռք բերել բոլոր անհրաժեշտ  նյութերը»,- ասաց Սարուխանյանը։

Կառույցում, կանխարգելիչ խիստ միջոցառումներից զատ, աշխատում են նորմալ գրաֆիկով։

Հիշեցնենք նաև, որ ՀՀ Կառավարությունը  2019թ-ի դեկտեմբերի 12-ին որոշում կայացրեց լուծարել Գյումրիի տուն-ինտերնատը։ Աշխատանքի ու սոցիալական հարցերի նախարարությունն այժմ պայմանագիր է կնքել Հայկական կարմիր խաչի հետ՝ նրան պատվիրակելով տուն-ինտերնատի սպասարկումն ու աշխատանքների կազմակերպումը։ Լուծարման գործընթացն այս պահին շարունակվում է, Կարմիր խաչը պաշտոնապես չի ստանձնել իր գործառույթները:

Էմմա Չոբանյան