Հասարակություն
24.03.2020 | 14:31
ՀՀ երկրորդ նախագահ, Մարտի 1-ի գործով ամբաստանյալ Ռոբերտ Քոչարյանի պաշտպան Հայկ Ալումյանն այսօր հրավիրված մամուլի ասուլիսի ժամանակ խոսեց դատական նիստերի հետաձգումների մասին։
«Մեզ հստակ չեն ասում, թե մեկ շաբաթից, մեկ ամիս, թե մեկ օրից կարող է մեր միջնորդությունը քննարկվել»,- ասաց Ալումյանը։
Խոսքը նախկին վարչապետների անձնական երաշխավորությամբ Ռոբերտ Քոչարյանին կալանքից ազատ արձակելու միջնորդության մասին է։
Ըստ Ալումյանի գործի վրա օրենքից բացի այլ բաներ կան, որոնք մեծ ազդեցություն ունեն:
«Քոչարյանի նկատամամբ որևէ խափանման միջոց կիրառելու հիմք չկա, սակայն հիմա հայտնի մարդու ցանկություններից ելնելով նրան կալանավորել են։ Այստեղ խոսքը խախտումների աստիճանը մեղմելու մասին է։ Օր առաջ որևէ ձևով դատարանը պետք է Քոչարյանին ազատ արձակի»,- ասաց փաստաբանը։
Դանիբեկյանի բացակայությամբ նիստեր չանցկացնելուց հետո, այլ դատավորի միջնորդությունը չմակագրելով, ըստ փաստաբանի, Առաջին ատյանի դատարանը անգործություն է ցուցաբերում։ Ալումյանը իրավական անհեթեթություն որակեց այն պնդումները, թե Ռոբերտ Քոչարյանն ազատության մեջ լինելով կարող է խոչընդոտել քրեական գործի քննությանը։
Լիլիթ Շաբոյան
