15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Գերմանիան մասամբ փակեց սահմանները հինգ հարևան երկրների հետ
Քաղաքականություն
16.03.2020 | 14:28
Իբրև կորոնավիրուսի տարածման դեմ պայքարի միջոց, Գերմանիան մասամբ փակեց սահմանները հինգ հարևան պետությունների՝ Ֆրանսիայի, Ավստրիայի, Շվեյցարիայի, Լյուքսեմբուրքի ու Դանիայի հետ։ Այս մասին մամուլի ասուլիսում հայտնել է Գերմանիայի ներքին գործերի նախարար Հորսթ Զեեհոֆերը։ Սահմանի հատումը թույլատրվելու է միայն հատուկ դեպքերում։ Այս սահմանափակումները չեն տարածվում բեռնափոխադրումների ու Գերմանիայի սահմանային գոտիներում ապրող այն քաղաքացիների վրա, որոնք աշխատում են հարևան երկրներում։
DW-ն հայտնում է, որ ներքին գործերի նախարարը չի պարզաբանել՝ սահմանի փակումը հարևանների հետ ինչքան ժամանակ կարող է տևել․ «Դա կախված է հետագա զարգացումներից»։
Դանիան Գերմանիայի հետ սահմանը փակել էր դեռ մարտի 14-ին։ Սահմանային հսկողություն Ավստրիայի ու Գերմանիայի միջև գործում է դեռ 2015 թվականից, երբ սկսվեց միգրացիոն ճգնաժամը։ Reuters-ի հաղորդմամբ՝ Ֆրանսիայի իշխանությունները պարզաբանել են, որ խոսքը գնում է Գերմանիայի հետ սահմանի ոչ թե ամբողջական փակման, այլ՝ կորոնավիրուսի տարածման դեմ պայքարով պայմանավորված հսկողության մեծացման մասին։
Վերջին օրերին կորոնավիրուսով վարակման դեպքերը Գերմանիայում ավելացել են 1196-ով։ Մարտի 15-ից սկսած այդ երկրում գրանցվել է 5795 վարակման դեպք, մահացել է 11 քաղաքացի։ Ավելի վաղ տեղեկացրել էինք՝ Ռուսաստանի կառավարությունը որոշում է ընդունել փակել սահմանը Բելառուսի հետ՝ թույլատրելով միայն բեռնափոխադրումները։ 14 սահմանակից պետություններից Ռուսաստանը չի փակել միայն Ադրբեջանի ու Ֆինլանդիայի հետ սահմանները։
