Նախատեսվածից քիչ են հորատել, արդյունքը գրավիչ չի եղել ներդրողների համար. Հաշվեքննիչ պալատի արձանագրած խեղաթյուրումները ՀՎԷԷՀ-ում

Հաշվեքննիչ պալատից տեղեկացնում են, որ Պալատի 6-րդ վարչությունը 2019թ․ ապրիլի 17-ից մինչև 2020թ․ փետրվարի 29-ը համապատասխանության և կատարողականի հաշվեքննություն է իրականացրել Հայաստանի վերականգնվող էներգետիկայի և էներգախնայողության հիմնադրամի 2017-2018 թվականների ֆինանսատնտեսական գործունեության նկատմամբ, որի արդյունքում արձանագրվել են անհամապատասխանություններ  և խեղաթյուրումներ, մասնավորապես՝

• Հիմնադրամի կողմից ծախսերի պլանավորումը կատարվել է թերություններով, առկա միջոցների ամբողջական բաշխվածությունն ապահովելու նպատակով հաշվի չեն առնվել ու չեն գնահատվել աշխատավարձի գծով կատարվելիք ծախսերի իրական ծավալներն ու նախորդ տարիների փաստացի ծախսերը: Հաստիքացուցակում ներառվել են չօգտագործվող հաստիքներ՝ հանգեցնելով աշխատավարձի գծով 2017-2018 թվականներին 1 և 78.3%-ի չափով ցածր կատարողականների:

• Հիմնադրամը բավարար հսկողություն չի իրականացրել հաստիքային աշխատողների և ծրագրերում ընդգրկված խորհրդատուների կողմից պայմանագրային պարտավորությունների լիարժեք կատարման, նրանց կողմից ներկայացվող հաշվետվությունների բովանդակության և առարկայականության, ժամկետների պահպանման նկատմամբ: Պայմանագրերում հաճախ ներառվել են գործառույթներ, որոնք, որպես կանոն, երկար ժամանակ չեն իրականացվել, կամ դրանց փաստացի իրականացումը հնարավոր չէ պարզել:

• Համաշխարհային բանկի ֆինանսավորմամբ իրականացվող՝ երկրաջերմային էներգիայի հետախուզական հորատման ծրագրի շրջանակում բարձր երկրաջերմային ֆոն ապահովելու նպատակով В-2 հորատանցքի հորատման համար նախատեսվել է 1500 մետրի փոխարեն հորատել 1800 մետր, սակայն իրականում այն հորատվել է ընդամենը 1684 մետր խորությամբ, որում  ստացված առավելագույն ջերմաստիճանը կազմել է մոտ 124°C՝ նախատեսված 150°C- փոխարեն։ Այլ կերպ՝ ստացված արդյունքը չի բավարարվել նվազագույն պայմաններին, որոնք պետք է գրավիչ լինեին ներդրողների համար։

• Հիմնադրամի կողմից պատշաճ ուշադրություն և հսկողություն չի իրականացվել Համաշխարհային բանկի ֆինանսավորմամբ իրականացվող՝ արդյունաբերական մասշտաբի արևային էներգիայի նախապատրաստական ծրագրի խորհրդատուների հետ կնքվող պայմանագրերի ճշգրիտ կազմման, դրանցով նախատեսված պայմանագրային պարտավորությունների կատարման ժամկետների պահպանման նկատմամբ: Բավարար միջոցներ չեն ձեռնարկվել ֆոտովոլտային կայանների կառուցման նպատակով պոտենցիալ ներդրողների ներգրավման ուղղությամբ, որի արդյունքում թվով 6 տեղանքից 5-ի նկատմամբ դեռևս առարկայական առաջարկություններ չեն ստացվել։

• 2017-2018 թվականներին երկու դրամաշնորհային ծրագրերի գործառնական ծախսերից կատարվել են 49,716.4 հազ.դրամի աշխատավարձի վճարումներ՝ 9,943.3 հազ. դրամը կազմել է ՀՀ կառավարության համաֆինանսավորումը, որոնք չէին կարող ուղղվել Հիմնադրամի հինգ աշխատողի աշխատավարձի վճարմանը:

• 2012 թվականի հուլիսի 30-ին ՀՀ ֆինանսների նախարարության և Հիմնադրամի միջև կնքված գործակալության համաձայնագրի շրջանակում մասնակից ֆինանսական կազմակերպությունների հետ կնքված պայմանագրերով Հիմնադրամն օժտված չէ գործուն վերահսկողական գործառույթներով՝ իրականացվող ծրագրի շահառուների ընտրության, վարկային միջոցների հատկացման, արևային ֆոտովոլտային և արևային ջրատաքացուցիչ համակարգերի տեղադրման աշխատանքների գնագոյացման, ինչպես նաև կատարված տեղադրման աշխատանքների ընթացքի և արդյունքների նկատմամբ: