ԵՐԵՎԱՆԻ ԺԱՄԱՆԱԿՈՎ. Միշտ ասում են, որ լկտի եմ, բայց ես լկտի չեմ, ես շատ համեստ մարդ եմ․ Սերգեյ Դանիելյան

«Քծնում եմ իշխանություններին, փող եմ տալիս, սապոնվում եմ՝ ամեն տեղ ինձ ընդունում են»,- Factor.am-ի «Երևանի ժամանակով» զրուցաշարի շրջանակում կատակում է դերասան Սերգեյ Դանիելյանը՝ պատասխանելով հարցին, թե ինչպես է յութուբյան Ք1 ալիքով սուր քննադատական հաղորդումներ թողարկելուց հետո իրեն հաջողվում մնալ հեռուստատեսությունում. «Ես էլ եմ զարմանում՝ ինձ ինչու են պահում․ ինձնից խելոք ու խարիզմատիկ դեմքեր կան այս դաշտում։ Երևի պահում են զուտ անկեղծության համար։ Իսկ յութուբյան ալիքում ինչ ուզում՝ անում եմ, եթե միայն առավոտյան ծրագրի շրջանակում լինեի, կարող էի կաթված ստանալ»։

Անդրադառնալով Ք1-ի շրջանակներում իր արած հումորներին՝ Սերգեյ Դանիելյանը շեշտում է. չափը սահմանողն ինքն է․ «Բայց ես չափը չեմ անցնում, միշտ ասում են, որ լկտի եմ, բայց ես լկտի չեմ, ես շատ համեստ մարդ եմ, և դա միայն ես եմ ասում, չգիտես ինչու…»։

Դերասանը անդրադառնում է հարցին, թե ինչու են Ք1-ի ծրագրերը հազվադեպ դարձել․ «Բան չի կատարվում։ Առաջ Ազգային ժողովում միշտ ինչ-որ բաներ ասում էին, հիմա բոլորը մտել են կոմֆորտ զոնայի մեջ, իրենց փայը ստացել են։ Ես նեղվում եմ, դա լճացում է, սպասում եմ՝ մի բան լինի, որ արձագանքեմ, կարծում եմ՝ ինձ սոված չեն թողնի։ Նայում ես՝ Ազգային ժողովում ոնց որ սովետական ժամանակները լինեն, մնում է՝ կթվորուհիների մասին խոսեն։ Լավ էր՝ Փաշինյանն ու Գեղամյանը իրար ծեծեցին, անդրադարձանք»։

Խոսելով թատրոնում և յութուբյան ալիքում ծավալած իր գործունեության մասին՝ Սերգեյ Դանիելյանը նշում է, որ ամեն բան ունի իր տեղը: «Ստրիպտիզ պարուհին կարող է և տանը ճաշ եփել, անպայման չէ՝ միշտ ձողը ձեռքին լինի»,- համեմատում է նա։

Սերգեյ Դանիելյանը խոստովանում է, որ քաղաքական ոչ բոլոր գործիչներին է նույն աչքով նայում․ «Ունեմ համակրելի քաղաքական գործիչներ, որոնց շրջանցում եմ, բայց վախենում եմ ասեմ՝ «հաբռգեն»։ Առաջին վախս ի հայտ եկավ Լևոն Տեր-Պետրոսյանից հետո․ նա միակ նախագահն էր, որին բոլորս ընտրեցինք, հետո տեսանք՝ ինչ եղավ»։

Խոսելով Հայաստանի ներքին և արտաքին քաղաքական խնդիրներից՝ դերասանը նշում է, որ իր թշնամին հայ ժողովուրդն է, այսինքն հենց ինքը՝ որպես այդ ժողովրդի մի մասնիկ․ «Մենք դարեր շարունակ չենք կարողանում ծնել լիդեր, որը կտա իդեա։ Իսկ մյուս երկրներից անպայման վատն ենք վերցնում։ Որ ասում ենք՝ Ռուսաստան՝ անպայման պետք է մեր շորերը հանենք, պառկենք տակը։ Ռուսաստանից վերցրել ենք ամենավատը՝ կոռուպցիան՝ որպես երկրի կառավարման հիմք,Եվրոպայից էլ միայն վատն ենք վերցնում»։