07.07.2026 | 11:11
59 երկրների իրավապահներ մարդկանց առևտրով զբաղվող հազարից ավելի անձի են ձերբակալել
«Հերքում ենք պահանջում», «Ես իմ խոսքի տերն եմ, վերջ». ԼՀԿ-ն դատի է տվել Լևոն Զուրաբյանին
Հասարակություն
27.02.2020 | 15:12
«Լուսավոր Հայաստան» կուսակցությունը և կուսակցության անդամ Դավիթ Խաժակյանը դատի են տվել «Հայ ազգային կոնգրես» կուսակցության փոխնախագահ Լևոն Զուրաբյանին: Այս մասին տեղեկանում ենք Datalex Դատական տեղեկատվական համակարգից:
Որպես պահանջ՝ նշված է «պատվի, արժանապատվության և գործարար համբավի պաշտպանություն»:
Factor.am-ի հետ զրույցում Դավիթ Խաժակյանը մանրամասնեց, թե ինչու են Լևոն Զուրաբյանին դատի տվել․ «Մոտ 1 ամիս առաջ նա հարցազրույց էր տվել, որի ընթացքում զրպարտիչ և վիրավորական խոսքերով էր հանդես եկել ԼՀԿ-ի և նրա հիմնադիրների նկատմամբ։ Ասել էր, թե ԼՀԿ-ն օլիգարխի պրոեկտ է՝ նշելով Միքայել Մինասյանի անունը: Նման գրառումներով պարբերաբար հանդես էին գալիս ֆեյսբուքյան տարբեր կեղծ էջեր, և հիմա հանրային գործիչը, առանց հաշվի նստելու այն փաստի հետ, որ սուտ և կեղծ տեղեկություն է տարածում, այդ մասին հրապարակային խոսք է ունեցել։ Կարծում ենք՝ այդ խոսքի համար նա պետք է իրավական պատասխանատվությնան ենթարկվի։ Դա մենք գնահատում ենք վիրավորանք և մեր գործարար համբավին վնաս, ու պարոն Զուրաբյանից հերքում ենք պահանջում»։
Լևոն Զուրաբյանն էլ, Factor.am-ի հետ զրույցում անդրադառնալով իր դեմ ներկայացված հայցին, ասաց․ «Ես իմ խոսքի տերն եմ, վերջ»։
Նշենք, որ դատական գործը մակագրվել է Երևան քաղաքի ընդհանուր իրավասության դատարանի դատավոր Լիլիթ Սարգսյանին: Հայցադիմումը դեռ վարույթ չի ընդունվել։
Նելլի Մելքոնյան
