Համաձայնագրից հատ առ հատ հանվել են այն կետերը, որոնք կարող էին զայրացնել Ռուսաստանին. Հովհաննես Իգիթյան

ԱԺ արտաքին հարաբերությունների հանձնաժողովի նախկին նախագահ, միջազգային տարբեր կառույցների փորձագետ Հովհաննես Իգիթյանի կարծիքով՝ ԵՄ-Հայաստան համաձայնագիրը հրապարկվեց, որպեսզի վերջ տրվի այդ առթիվ շահարկումներին:

«Ռուսական մամուլում հայտարարություններ էին արվում փաստաթղթի մասին, ընդ որում տպավորությունն այնպիսին էր, որ նրանք կարդացել են, իսկ մենք՝ ոչ: Ներկայացվում էր, որ սրանով միանգամից Հայաստանում օրենքներ կընդունվեն, ինչը հասարակության համար անընդունելի կլինի, կամ էլ կլինեն պարտադրանքներ՝ ատոմակայանը փակելու շուրջ»,- նշեց Իգիթյանը՝ հավելելով. «Համաձայնագրից հատ առ հատ հանվել են այն կետերը, որոնք կարող էին զայրացնել Ռուսաստանին»:

Համաձայնագրում առկա են մի շարք կետեր՝ ժողովրդավարության ամրապնդման, դատական անկախության ապահովման, կոռուպցիայի դեմ իրական պայքարի մասին, մինչդեռ Հայաստանի իշխանությունը անցած տարիներին որևէ առաջընթաց չի գրանցել այդ ուղղությամբ:

Հարցին, թե այս համաձայնագրով արդյոք դրանք կյանքի կկոչվեն և արդյոք չեն մնա որպես դեկլարատիվ պարտավորություններ, փորձագետը նախ նկատեց, որ համաձայանգրով ԵՄ-ն ոչ միայն խորհրդատվական օգնություն է ցուցաբերում Հայաստանին, այլև ֆինանսավորելու է այդ բարեփոխումների իրականացումը: «Մի փուլ ենք անցել, որ Հայաստանի իշխանությունը՝ իրենց կարծիքով հայկական խորամանկությամբ, ձևացնում էր, թե ինչ- որ բան է անում և այդ պրոեկտները գալիս էին: Այնպես չէ, որ ԵՄ-ն չէր տեսնում այդ խորամանկությունը, բայց հասկանալով, որ դժվար է սովետական երկրից անցնել ժողովրդավար, նորմալ համակարգի, նույնիսկ ԵՄ պաշտոնյաները փակում էին աչքերը՝ որոշ գումարների ոչ էֆեկտիվ օգտագործման առթիվ: Բայց դա չի կարող անընդհատ կրկնվել ու երկարատև լինել: Դրա համար այստեղ նաև մեխանիզմեր կան. գումարը կտրվի միայն այն ժամանակ, երբ որ կողմերը կտեսնեն, որ այն էֆեկտիվ է օգտագործվում»,- նշեց Իգիթյանը՝ եզրափակելով. «ԵՄ Հայաստան համաձայանգիրը չսոտարգրելու դեպքում Հայաստանը կկորցնի զարգանալու հնարավորությունը»:

Մանրամասները՝ դիտեք Հովհաննես Իգիթյանի հետ Factor.am-ի հարցազրույցում:

Մարինե Խառատյան