Բավական խոստումնալից հայտարարություն էր, նախագահի մոտ կա վստահություն. Վահրամ Բաղդասարյանը՝ Սարգսյան-Ալիև հանդիպման մասին

Չնայած ԵԱՀԿ Մինսկի խմբի համանախագահների և Հայաստանի ու Ադրբեջանի  արտգործնախարարների տարարած հայտարարության մեջ որևէ խոսք չկա Վիեննայում և Սանկտ Պետերբուրգում ձեռք բերված պայմանավորվածությունների մասին, այնուամենայնիվ ԱԺ ՀՀԿ խմբակցության ղեկավար Վահրամ Բաղդասարյանը Factor.am-ի հետ զրույցում հայտարարեց՝ հայկական կողմի համար հարցը շարունակում է մնալ օրակարգում:

Երեկ Ժնևում կայացած հանդիպումից հետո ԵԱՀԿ Մինսկի խմբի համանախագահները և երկու երկրների արտգործնախարարները հայտարարեցին՝ Հայաստանի և Ադրբեջանի նախագահները համաձայնել են հավելյալ քայլեր ձեռնարկել՝ շփման գծում լարվածությունը թուլացնելու համար:

«Մենք չենք խուսափում բանակցություններից՝ անկախ նրանից անպտուղ կլինի՞, թե՞ արդյունավետ: Մենք կողմնակից ենք խնդրի խաղաղ կարգավորմանը: Այդ առումով բավական լուրջ անելիք ունի ԵԱՀԿ Մինսկի խումբը, որովհետև պայմանավորվածությունները վերաբերում են Վիեննայում և Սանկտ Պետերբուրգում ձեռք բերված պայմանավորվածություններին, որոնք չեն կատարվում հարևան երկրի կողմից: Ինձ թվում է, որ միջազգային ատյանների միջամտությունը խիստ անհրաժեշտ է»,- ասաց ՀՀԿ խմբակցության ղեկավարը՝ հավելելով, որ հայկական կողմը փորձելու է բանակցությունների արդյունքում հասնել նրան, որ ամբողջ սահմանին տեղադրվեն մշտադիտարկման սաքրեր և լինեն հասցեական գնահատականներ:

Չնայած նրան, որ շուրջ մեկուկես տարի առաջ Վիեննայում և Սանկտ Պետերբուրգում կայացած հանդիպումներում հակամարտող կողմերը պայմանավորվել էին սահմանային միջադեպերը հետաքննելու մեխանիզմներ մշակել, այդուհանդերձ մինչ օրս այդ ուղղությամբ որևէ առաջընթաց չկա: Բաղդասարյանը վստահեցրեց՝ հայկական կողմը պնդելու է, որ ձեռք բերված պայմանավորվածությունները կյանքի կոչվեն:

Factor.am-ը ՀՀԿ խմբակցության ղեկավարից հետաքրքրվեց՝  նախկինում Սերժ Սարգսյանը չի հայտարարել՝ Ալիևը ևս շահագրգռված է, որ զոհեր չլինեն սահմանին, ի՞նչ է փոխվել, որ նման հայտարարություն է անում նախագահը, Բաղդասարյանը պատասխանեց. «Դա բավական խոստումնալից հայտարարություն էր, որ նախագահի մոտ կա վստահություն և, իհարկե, շատ կարևոր է՝ Ալիևի խոսքերը հավատ ներշնչեն: Եթե պայմանավորվածությունը եղել է շատ հստակ, ինձ թվում է՝ նման հայտարարություն կանի նաև Ալիևը»:

Հարցազրույցն ամբողջությամբ՝  տեսանյութում:

Շողիկ Գալստյան