Խաժակյանը նոր, աղմկոտ բացահայտումներ է խոստանում. կան չհրապարակված փաստաթղթեր. ՏԵՍԱՆՅՈՒԹ

GALLUP international association-ի Հայաստանում լիիրավ անդամ Էմ Փի Ջի ՍՊԸ-ի հրապարակած տվյալների համաձայն՝ Երևանի քաղաքապետարանին գործարարների կողմից մեքենաների նվիրաբերումը «միանշանակ կոռուպցիա չէ»՝ ըստ երևանցիների 43․4%-ի, «ավելի շուտ կոռուպցիա չէ» ըստ 22․8%-ի։ Այսպիսի գործարքները ավելի շուտ կոռուպցիա համարում են հարցվածների 9․2%-ը, և «միանշանակ կոռուպցիա՝ 7․5%-ը։

Լրագրողները Երևանի ավագանու «Լույս» խմբակցության ղեկավար Դավիթ Խաժակյանից հետաքրքրվեցին՝ ինչո՞ւ հասարակությունը մեծ հաշվով կոռուպցիա չի համարում մեքենաների նվիրատվությունները քաղաքապետարանին։ Խաժակյանը դա բնական համարեց․ «Մարդկանց մոտ կոռուպցիան անձնական հարստացման հետ ասոցացվող երևույթ է, բայց պետք է հասկանանք, որ կոռուպցիան նաև քաղաքական երևույթ է և դա միջազգային ձևակերպում է։ Քաղաքական կոռուպցիայի ձևակերպում է, երբ պաշտոնյան անցնում է լիազորությունները՝ հետապնդելով քաղաքական շահ։ Կամազների գործարքի դեպքում եղել է դասական քաղաքական կոռուպցիա, որի միտումը սեփական կառավարչական ձախողումները քողարկելն է։ Կոռուպցիան մի դեպքում լինում է պոզով, մյուս դեպքում՝ պարզապես ականջներով, այս դեպքում տրվում է շինթույլտվություն կամ ինքնակամ շինությունը օրինականացվում է, և դրա դիմաց քաղաքապետարանը ստանում է ինչ-որ գույք»,- պատասխանեց Դավիթ Խաժակյանը։

Դավիթ Խաժակյանը նոր, աղմկոտ բացահայտումներ է խոստանում, ասում է՝ ձեռքի տակ կան դեռ չհրապարակված փաստաթղթեր․ «Կարելի է պարզապես հետևել գնումների առցանց ընթացակարգերին և տեսնել՝ ինչքան վիճահարույց հանգամանքներ, ինչքան փոխկապակցվածություններ կան, պարզապես դրանք 100 տոկոսանոց ապացուցելն է բարդանում և ժամանակատար լինում, որովհետև հիմա քաղաքային իշխանությունը ամեն ինչ հերքում է և պետք է կարողանալ ամեն ինչ փաստերով ապացուցել»,- ասաց պարոն Խաժակյանը։

Մանրամասները՝ տեսանյութում:

Ռոբերտ Անանյան