«Ժնևի հանդիպումը միտված էր նրան, որ մոռացության մատնվեն ապրիլյան պատերազմի դեպքերը»․ Արման Մելիքյան

Արցախի նախկին ԱԳ նախարար Արման Մելիքյանը Factor.am-ի հետ զրույցում «նահանջ» է անվանում ԵԱՀԿ Մինսկի խմբի նախաձեռնությամբ երեկ Ժնևում կայացած Սարգսյան-Ալիև հանդիպումը։

«Դա նահանջի շարունակությունն էր։ Նահանջը տարիներ շարունակ է տեղի ունենում, սա այդ գործընթացի հերթական հանգրվանն էր»,- ասաց Արցախի նախկին ԱԳ նախարարը՝ հավելելով․«Այս հանդիպումը միտված էր նրան, որ մոռացության մատնվեն ապրիլյան պատերազմի դեպքերը, և մեր բոլորի ուշադրությունը շեղեն այն հանգամանքից, որ հակառակ իշխանությունների պնդումներին, ստատուս քվոն խախտվել է»:

Արման Մելիքյանը նկատում է, որ 1,5 տարվա ընթացքում Վիեննայում և Սանկտ Պետերբուրգում ձեռք բերված պայմանավորվածությունները «մնացին ջրին գրված և այդպես էլ կմնան»։ Ըստ Մելիքյանի՝ Ժնևի հանդիպումը «փաստեց, որ ստատուս քվոյի խախտումը անպատժելի երևույթ է, և պաշտոնական Երևանը չի պատրաստվում ստատուս քվոյի խախտումների դեմ որևէ հակաքայլ ձեռնարկել»։

Արցախի ԱԳ նախկին նախարարը Ժնևի հանդիպումից հետո Սերժ Սարգսյանի հայտարարության մեջ վտանգավոր միտում է տեսնում, որ այն համահունչ է թե՛ ռուսաստանցի փորձագետների և քաղաքական դեմքերի, թե՛ ադրբեջանցի պաշտոնյաների պնդմանը, որ հարկավոր է նոր մոտեցում հանդես բերել։ Ըստ այդ մոտեցման՝ հայկական կողմը պետք է վերադարձնի ազատագրված տարածքները իրավիճակի բարելավման դիմաց։

«Իսկ իրավիճակի բարելավում ասելով՝ նկատի ունեն այն, որ քանի դեռ հայկական կողմը տարածք է հանձնում, Ադրբեջանը պարտավորվելու է որևէ ուժային միջոցի չդիմել»,- նշեց Մելիքյանը։

«Մեծ հաշվով, այս հանդիպման արդյունքը կարող ենք համարել այն, որ պարոն Սերժ Սարգսյանը գուցե շատ հեռակա, գուցե հեռվից մոտենալով, բայց այնուամենայնիվ հանդես եկավ նոր ադրբեջանա-ռուսական մոտեցման դիրքերից, և այս հանդիպման ձևաչափը միտված է նրան, որ մոռացության մատնվեն ապրիլյան պատերազմի դեպքերը և մեր բոլորի ուշադրությունը շեղեն այն հանգամանքից, որ հակառակ Հայաստանի իշխանությունների բոլոր պնդումների, ստատուս քվոն 2016 թ-ի ապրիլին խախտվել է ինչպես տարածքային, այնպես էլ քաղաքական մասով»։ Ըստ Մելիքյանի՝ այդպիսի մոտեցմամբ այսօր Հայաստանի  իշխանությունը երկիրը գլորում է դեպի կապիտուլյացիա։

Արցախի ԱԳ նախկին նախարարը կարծում է, Սերժ Սարգսյանը պետք է գնար Ժնև սեփական օրակարգով․ «Բայց երբ չկա հակախաղ պարունակող քայլերի ծրագիրը, ապա այդ գնալն իրոք անիմաստ էր»։

Մանրամասները դիտեք Արցախի նախկին ԱԳ նախարար Արման Մելիքյանի հետ Factor.am-ի հարցարզրույցում։

Մարինե Խառատյան