«Տպավորություն է, որ այս մրցույթները մեզնից բացի ոչ ոքի պետք չեն». Գոհար Հարությունյան. ՏԵՍԱՆՅՈՒԹ

«Երբ նախապատրաստական աշխատանքներ էին տարվում, այնպիսի տպավորություն էր, որ այս մրցույթը մեզանից բացի ոչ մեկի պետք չէ: Սովորաբար քվեարկում են հաշված մարդիկ, չկա աջակցություն: Ոչ մի աղջկա տիտղոս չեն տա, եթե ժողովուրդը նրան չի սատարում: 3 տարի է՝ զբաղվում եմ այս մրցույթներով, բայց համբերությունս արդեն լցվում է: Շատ անշնորհակալ գործ ստացվեց»,- այս մասին այսօր հրավիրված ասուլիսի ընթացքում նշեց «Միսս տիեզերք Արմենիա» և «Միսս աշխարհ Արմենիա» մրցույթների ազգային տնօրեն Գոհար Հարությունյանը:

«Մենք ներկայացրել ենք հագուստ, որը նախապես պատրաստվել էր թե՛ իմ, թե՛ Հայաստանի ներկայացուցչի և թե՛ դիզայների հավանությամբ: Ոչ մի կանխազգացում չունեի, որ հասարակության կողմից այսպիսի վատ արձագանք կլինի: Չեմ կածում, որ մեր հագուստն այդքան վատն էր: Օրինակ՝ Չիլիի հագուստի վրա գիլաս էր պատկերված, Կանադայի ազգային հագուստի վրա կանեփեր էին պատկերված: Պարտադիր չէ, որ դա լինի հենց տարազ: Կարող է պարզապես ազգային էլեմենտ պարունակել: Համացանցում ամենաշատն ինձ վրա ցեխ շպրտեցին: Բացի այդ, ես չեմ իմացել, որ մեր ներկայացուցիչն ու դիզայները պայմանավորվածություն են ունեցել, որ տարազով ներկայանալու դեպքում նա պետք է չժպտա: Ես զարմացել էի»,- ասաց Գոհար Հարությունյանը:

Հիշեցնենք, որ այս տարվա հուլիսի վերջին տեղի ունեցած «Միսս տիեզերք Արմենիա 2019» գեղեցկության մրցույթում հաղթող ճանաչված Դայանա Դավթյանն օրերս մասնակցել էր «Միսս տիեզերք 2019»-ին, ինչից հետո համացանցում բուռն քննարկումներ էին ծավալվել՝ կապված նրա հագուստի, թագի և բեմական պահվածքի շուրջ:

Մանրամասները՝ տեսանյութում:

Նելլի Մելքոնյան