Գյումրիի վթարային չորս շենքերի հարցն առաջիկայում կլուծվի

Գյումրիի՝ բարձր վթարայնությամբ 4 շենքերի բնակիչների բնակարանային հարցը լուծելու վերաբերյալ Շիրակի մարզպետարանի առաջարկը դրական արձագանք է ստացել Տարածքային կառավարման ու ենթակառուցվածքների նախարարության կողմից:

Քաղաքաշինության կոմիտեի Բնակարանային ֆոնդի կառավարման և կոմունալ ենթակառուցվածքների վարչության պետ Տանյա Արզումանյանը լրագրողների հետ զրույցում նշել էր, որ 2020-2022 թթ. միջնաժամկետ հատվածում բյուջեից ֆինանսական միջոցներ են նախատեսվել Գյումրիում՝ 3, Սպիտակում և Վանաձորում՝ 1-ական բազմաբնակարան շենքերի կառուցման համար: Բացի այդ՝ արդեն հանձնարարականներ կան Շիրակի մարզպետարանի կողմից բարձրացված 4 վթարային շենքերի խնդրի լուծման ուղղությամբ:

Նշենք, որ Շիրակի մարզում կա 114 բազմաբնակարան բնակելի վթարային շենք, որից 92-ը՝ Գյումրիում:  Ծրագրում ընդգրկված Տիգրան Մեծ 5 հասցեի շենքը, որը Գյումրիի ամենաբանուկ հատվածներից մեկում է գտնվում,  քաղաքի 3-րդ կարգի վթարային է և ապրելու համար խիստ վտանգավոր: Այս շենքում փլուզումները մշտական բնույթ են կրում: Վերջինը հուլիսին էր, երբ 2-րդ հարկի բնակարանի պատշգամբն էր փլուզվել, բարեբախտաբար՝ ոչ ոք չէր տուժել։

Հիմա շենքն ամբողջությամբ բնակեցված չէ, վտանգի առկայության պատճառով բնակիչների մի մասը հեռացել է: Ի դեպ՝ շենքի տանիք նույնպես մասնակի փլվել է:

«Մենք ամեն տարի այս շենքն ընդգրկել ենք միջնաժամկետ ծրագրում, բայց ֆինանսավորում չլինելու պատճառով մինչև այս պահը շենքը մնացել է այդ վիճակում։ Սակայն մենք այս ամսվա մեջ արդեն չորս անգամ դիմել ենք նախարարություն, որպեսզի շենքն անպայման ընդգրկվի առաջնահերթ լուծում պահանջող մարզի հիմնախնդիրների ծրագրում»,- ավելի վաղ Factor.am-ի հետ զրույցում ասել էր Շիրակի մարզպետարանի քաղաքաշինության վարչության ճարտարապետաշինարարական բաժնի գլխավոր մասնագետ Մկրտիչ Ասատրյանը։

Հիմա շենքն արդեն ընդգրկված է ծրագրում, բնակիչներն էլ Factor.am-ի հետ զրույցում նշեցին, որ երկար տարիների սպասումից հետո վերջապես կհիմնանորոգվի ու կկարողանան հանգիստ ապրել։

Ի դեպ, քանի որ շենքը մշակութային արժեք է ներկայացնում, մի մասն էլ ամրացված է, նախատեսվում է իրականացնել վթարային մասի վերականգնում, ամրացում։

Ծրագրում ընդգրկված մյուս վթարային շինություններից են Անտառավան 3-րդ թաղամասի 26 շենքը, Իսահակյան փողոցի 9ա շենքն ու Ղուկասյան փողոցի 29 շենքը։ Ի տարբերություն Տիգրան Մեծ 5 հասցեի շենքի՝ այս շենքերը չեն ամրացվելու: Նախատեսվում է դրանք ապամոտաժել, իսկ բնակիչներին հատկացնել բնակարանի գնման վկայագրեր։ Այս որոշումը, սակայն, դեռ վերջնական չէ, քննարկումները շարունակվում են, Շիրակի մարզպետարանն էլ սպասում է Կառավարության որոշման նախագծին, որը, հավանաբար, մինչև տարեվերջ կլինի։

Էմմա Չոբանյան