Շքեղ տոնական լույսեր ու զարդարանքներ. Գյումրին պատրաստվում է Ամանորի տոներին. ԼՈՒՍԱՆԿԱՐՆԵՐ

Գյումրիում Ամանորին սկսել են նախապատրաստվել դեռ նոյեմբերի վերջից, երբ սկսվեցին քաղաքի գլխավոր տոնածառի տեղադրման աշխատանքները: 27 մետր բարձրություն ունեցող տոնածառն այս տարի գյումրեցիներին կներկայանա նոր ձևավորմամբ ու գույներով:

Ավագանու որոշմամբ՝ 900.000 դրամ է հատկացվել տոնածառի ձևափոխման, իսկ եղևնու մետաղական կոնստրուկցիայի մոնտաժման, ապամոնտաժման, դեկորների վերանորոգման համար՝ մոտ 3 մլն դրամ։

Գլխավոր տոնածառի տեղադրմանը զուգահեռ՝ Գյումրիի փողոցները ևս զարդարման փուլում են: Փողոցների մեծ մասի զարդարման ու տոնական լուսավորման աշխատանքներն ավարտվել են:

Նշենք, որ վարչապետ Նիկոլ Փաշինյանն իր ֆեյսբուքյան գրառումներով անդրադարձել էր Գյումրիի տոնական ձևավորմանը: Հատկապես աչքի է ընկնում Գյումրիի պատմական միջուկի վերանորոգված փողոցների շքեղ տոնական լուսավորումը, ամեն փողոցի համար ընտրված է առանձին գունային գամմաս։ Նշենք, որ մոտ 10 մլն դրամ է հատկացվել հիմնանորոգված փողոցների տոնական ձևավորման համար: Ի դեպ՝ տոնական ձևավորմամբ կներկայանան ոչ միայն քաղաքի կենտրոնական փողոցները։

«Երևանյան խճուղի փողոցում 124 դեկոր ենք ամրացրել, տոնական ձևավորում կունենան Գարեգին Նժդեհի հրապարակը, հետո գալիս ենք Մուսայելյան, Գորկի, Տերյան փողոցներ՝ պատմական միջուկի 7 փողոցներն են, դրանից հետո՝ Շիրակացի փողոցը, Մովսես Խորենացին, Պարույր Սևակը, Թբիլիսյան խճուղին: Երևանյան խճուղում ու պատմական միջուկի փողոցներում նոր դեկորներ են, իսկ մնացածը վերանորոգվող են: Ունենք նաև երկու տոնածառ, որ տեղադրել ենք Անի թաղամասում, Մուշ թաղամասինն էլ ընթացքի մեջ է»,- Factor.am-ի հետ զրույցում ասաց Գյումրու քաղաքապետարանի ենթակայության «Գյումրու կոմունալ ծառայություն» բյուջետային հիմնարկի տնօրեն Վարդգես Սամսոնյանը։

Նախատեսվում է փողոցների տոնական ձևավորումն ավարտել մինչև դեկտեմբերի 20-ը. այդ օրն էլ կվառվեն գլխավոր տոնածառի լույսերը։

Բացի այդ՝ դեկտեմբերի 25-ից հունվարի 6-ը Գյումրիի կենտրոնական հրապարակում կկազմակերպի ամանորյա տոնավաճառ: Այդ նպատակով կտեղադրվեն 20 տնակ-կրպակներ:

Էմմա Չոբանյան