«Մոտ երկու միլիոն դրամ միայն ռեստորանին ենք հատկացնելու, նորմալ է». Շենգավիթի թաղապետն՝ ամանորյա խնջույքի մասին

Factor.am-ի հարցազրույցը Շենգավիթ վարչական շրջանի ղեկավար Ռազմիկ Մկրտչյանի հետ

-Պարոն Մկրտչյան,  «Լույս» խմբակցության ավագանու անդամները հայտարարում են, որ վարչական շրջանների աշխատակազմերը բյուջեի հաշվին ռեստորաններում կորպորատիվ երեկույթ են կազմակերպելու: Ձեզ մոտ նախատեսվա՞ծ է նման միջոցառում:

-Նման ծախս նախատեսված է բյուջեով, նախորդ տարիներին ևս եղել է:

-Նախկիններին քննադատում են բյուջեն փոշիացնելու համար, այսինք՝ նրանց սխալը շարունակո՞ւմ եք կրկնել:

-Ես չեմ կարծում, որ սա սխալ գործողություն է: Ամեն դեպքում, եթե կորոշվի մեկ ընդհանուր ձևաչափով ընդհանրապես չանել նմանատիպ միջոցառումներ, ապա մենք էլ չենք անի:

-Ո՞ր ռեստորանում եք կազմակերպելու երեկույթը:

-Մենք նշել ենք չափորոշիչներ և, բնականաբար, այդ տվյալներին համապատասխան ծառայություններ մատուցող կազմակերպությունը:

-Որքա՞ն գումար եք հատկացնելու այդ խնջույքին:

-Մոտ երկու միլիոն դրամ՝ միայն ռեստորանին ենք հատկացնելու:

-Իսկ քանի՞ հոգի է մասնակցելու միջոցառմանը, ամբո՞ղջ աշխատակազմը:

-Մոտավորապես 140 հոգի մարդ է լինելու:

-Բայց ի՞նչ պարտադիր է, որ համայնքի հաշվին աշխատակիցները կորպորատիվ անեն:

-Այսպես թե այնպես՝ կազմակերպվում է, այլ հարց է, թե որ վարչական շրջանում ինչպես է արվել:

-Եկեք Ձեր կողմից ղեկավարվող վարչական շրջանի մասին խոսենք: Դուք ի՞նչ հիմնավորումներ ունեք, որ վարչական շրջանի աշխատակազմը պետք է հարկատուների հաշվին երկու մլն դրամով կորպորատիվ անի:

-Չէ,  մենք խոսում ենք, թե Երևանում ի՞նչ է տեղի ունենում: Ես գիտեմ, որ բոլոր վարչական շրջաններում այս միջոցառումը կա:

-Այսինքն՝ արդարացված է, որ հարկատուների հաշվին պետք է  տոնական խնջույք անեք:

-Ես կարծում եմ, որ սա հնարավորություն է աշխատակազմով այս տոնական միջոցառմանը ավարտը տալ, այսինքն՝ հաջորդ տարվա տոնական միջոցառումն է: Ես նորմալ երևույթ եմ համարում:

Նարեկ Կիրակոսյան