ՏԱՐԱԿԱՐԾԻՔ. Հայ-ռուսական միացյալ զորախումբը ինքնիշխանության զիջո՞ւմ, թե՞ անվտանգության ամրապնդում

Հայաստանի խորհրդարանն օրերս ձայների 7 դեմ, 87 կողմ հարաբերակցությամբ վավերացրեց հայ-ռուսական միացյալ զորախումբ ստեղծելու մասին համաձայնագիրը:

Միացյալ զորախմբի ստեղծման անհրաժեշտությունը, ինչպես նշվում է համաձայնագրում, պայմանավորված է  հավաքական անվտանգության Կովկասյան տարածաշրջանում կողմերի տարածքների առանձնացվածությամբ և դրանց սահմաններում լուծվող օպերատիվ-ռազմավարական խնդիրների ծավալով, ուստի անհրաժեշտ է ստեղծել զինված ուժերի միացյալ խմբավորում, որը կպաշտպանի կողմերի քաղաքացիներին՝ արտաքին և ներքին ռազմական սպառնալիքներից։

Պաշտպանության փոխնախարար Արտակ Զաքարյանը խորհրդարանում նշել էր, որ զորախումբը գործում է արդեն 15 տարի: Վավերացված համաձայնագրով, սակայն, ընդլայնվելու են կողմերի հնարավորությունները:

Եվ մինչ Հայաստանի պաշտպանության նախարարությունն ու իշխող Հանրապետական կուսակցության ներկայացուցիչները  հայտարարում են, որ համաձայնագիրը բխում է Հայաստանի ազգային անվտանգության ռազմավարությունից, համաձայնագրի ընդդիմախոսները պնդում են՝  անվտանգության որևէ երաշխիք այս համաձայնագիրը չի ընձեռում: Ավելին՝ նրանց համոզմամբ՝ այս համաձայնագրով ոչ միայն զգալիորեն թուլանում  է Հայաստանի ինքնիշխանությունը, այլև առաջանում են թե՛ ներքին, թե՛ արտաքին  նոր վտանգներ:

Թեմայի շուրջ Factor.am-ը զրուցել է ԱԺ ՀՀԿ խմբակցության պատգամավոր Արման Սաղաթելյանի և ընդդիմադիր «Ելք» խմբակցության քարտուղար Գևորգ Գորգիսյանի հետ:

Շողիկ Գալստյան