Այլընտրանք չունեմ՝ կանգնած եմ և ուղիղ էլ պետք է ասեմ․ Ատոմ Ջանջուղազյանը՝ Անի Սամսոնյանին. ՏԵՍԱՆՅՈՒԹ

Ազգային ժողովում շարունակվում են 2020 թվականի բյուջեի նախագծի վերջնական տարբերակի քննարկումները։

ԱԺ «Լուսավոր Հայաստան» խմբակցության պատգամավոր Անի Սամսոնյանն ասաց, որ ինքը ներկայացրել է 4 առաջարկություն, որից 3-ը խոշոր առաջարկներ են եղել։

«Ես առաջարկները ներկայացրել էի, որովհետև դրա համար անհրաժեշտություն կար։ Օրինակ՝ առաջարկել էի Արարատի մարզի Արևաբույր համայնքում կառուցենք նոր դպրոց, որովհետև դպրոցը վերանորոգման որևէ հույս չունի և ենթակա էլ չի։ Ես ուզում եմ, որ Դուք հիմա կանգնենք և ուղիղ ասեք, թե ինչո՞ւ չեք ընդունել իմ առաջարկները»,- հետաքրքրվեց Սամսոնյանը։

Ֆինանսների նախարար Ատոմ Ջանջուղազյանը կատակով արձագանքեց․ «Այլընտրանք չունեմ էլ, ճիտն ասած, կանգնած եմ և ուղիղ էլ պետք է ասեմ, բայց ասածս իր մեջ մի քիչ նաև հարց է պարունակելու․ Ձեր առաջարկները, որոնք ներկայացրել եք, Դուք մնացած առաջարկների համատեքստում քննարկե՞լ եք իրանց հետ։ Դուք այնպիսի հարց ձևակերպեցիք, որ չընդունելը, մեղմ ասած, լավ բան չէ։ Ճիշտն ասած՝ ես այդպես չեմ վերաբերվում, որովհետև Ձեր առաջարկը կտրված է կոնտեքստից։ Հիմա մենք ասում ենք՝ դպրոց կառուցենք, Դուք ասում եք կոնկրետ այ էս տեղում դպրոց կառուցենք, ինչի՞ շրջանակում։ Ինչի՞ շրջանակումը վերաբերում է հետևյալին, որ մենք վերլուծել ենք, իրավիճակը գնահատել ենք, հասկացել ենք, ունենք ռազմավարական ծրագիր, առաջնահերթությունները որոշել ենք և պարզել ենք, որ առաջնահերթ է Ձեր մատնանշած համայնքում դպրոցի կառուցումը և մերժե՞լ ենք, կարծում եմ՝ այդպիսի բան չի եղել»։

Մանրամասները՝ տեսանյութում։