Բարգավաճման վարկանիշում ՀՀ-ն առաջ է անցել ՌԴ-ից և Ադրբեջանից, բայց զիջել է Վրաստանին

Բրիտանական Legatum վերլուծական ինստիտուտի՝ 2019 թվականի Բարգավաճման ինդեքս վարկանիշում (The Legatum Prosperity Index) Հայաստանն առաջ է անցել հետխորհրդային տարածքի բոլոր պետություններից՝ բացառությամբ Բալթյան պետությունների և Վրաստանի:

Բարգավաճման վարկանիշում Հայաստանը զբաղեցրել է 61-րդ հորիզոնականը՝ անցյալ տարվա համեմատ դիրքերը բարելավելով 27 կետով:

Տարածաշրջանի երկրներից Հայաստանը զիջել է միայն 53-րդ հորիզոնականը զբաղեցնող Վրաստանին, և առաջ է անցել Ռուսաստանից (74-րդ տեղ), Թուրքիայից (91-րդ տեղ), Ադրբեջանից (92-րդ տեղ) և Իրանից (119-րդ տեղ):

Հետխորհրդային երկրներից ամենաբարձր վարկանիշն ունեն Բալթյան երկրները: Էստոնիան վարկանիշում զբաղեցրել է 21-րդ հորիզոնականը, Լիտվան՝ 33, Լատվիան՝ 35-րդ տեղը:

Նախկին ԽՍՀՄ երկրները վարկանիշային աղյուսակում գրանցել են հետևյալ ցուցանիշները. Բելառուս՝ 73, Մոլդովա՝ 81, Ղրղզստան՝ 88, Ուկրաինա՝ 96, Ուզբեկստան՝ 103, Թուրքմանստան՝ 108, Տաջիկստան՝ 114-րդ հորիզոնական:

Ամենաբարեկեցիկ երկրների եռյակում Դանիան, Նորվեգիան և Շվեյցարիան են: Վարկանիշի վերջին հորիզոնականներն էլ զբաղեցրել են Կենտրոաֆրիկյան Հանրապետությունը, Եմենը և Հարավային Սուդանը:

Վարկանիշի հեղինակները երկրները համեմատել են 9 չափանիշով. տնտեսության զարգացման մակարդակ, գործարար միջավայր, պետական կառավարման արդյունավետություն, կրթական, առողջապահության, անվտանգության և անձնական ազատության մակարդակ, ինչպես նաև սոցիալական կապիտալի զարգացում և էկոլոգիական միջավայր: