09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Գյումրիի հիվանդանոցի հակատուբերկուլյոզային բաժանմունքը փակվում է. շուրջ 20 աշխատող գործազուրկ է դառնում
05.11.2019 | 15:19
Գյումրիի ինֆեկցիոն-հակատուբերկուլյոզային հիվանդանոցի հակատուբերկուլյոզային բաժանմունքը կդադարի գործել: Factor.am-ի հետ զրույցում Շիրակի մարզպետարանի առողջապահության և սոցիալական ապահովության վարչության պետի պաշտոնակատար Լեյլի Ասլանյանն ասաց՝ նման որոշում կայացրել է Կառավարությունը մեկ տարվա քննարկումների արդյունքում:
«Կառավարության N1911 որոշում կա մարզային առողջապահական բժշկական հաստատությունների օպտիմալացման վերաբերյալ։ Սա 2006 թվականի որոշում է: Պարբերաբար, երբ լինում է օպտիմալացման անհրաժեշտություն, քննարկվում է, հաշվի են առնում ծանրաբեռնվածությունը, հիվանդների քանակը, պահելու ծախսը, արդյունավետությունը: Եվ հիմա Կառավարության այդ որոշման հետ կապված մի տարի է՝ քննարկումներն ընթանում էին, թեր և դեմ կողմերը ներկայացված են, հիմա արդեն նախագիծը դարձել է որոշում։ Եվ այդ որոշմամբ, այո՛, բաժանմունքը փակվում է»,- ասաց Լեյլի Ասլանյանը:
Նրա խոսքով՝ որոշումը կայացնելիս հաշվի են առնել մի շարք հանգամանքներ։ «Կա վիճակագրություն, bազմաթիվ հարցեր են հաշվի առնվել։ «Բժիշկներ առանց սահմանների» կազմակերպությունը նաև բուժում էր իրականացնում, տուբերկուլյոզով հիվանդածությունը, ստացիոնար դեպքերը բավականին նվազել էին: Այսինքն՝ ամբուլատոր օղակում բավականին լավ արդյունքներ էին ունենում։ Ծանր, ստացիոնար դեպքերը զգալի նվազել էին: Չեմ ասում՝ չկան, դրանք կան, կլինեն, ուղղակի բաժանմունքն էլ արդեն աշխատում էր թերծանրաբեռնված։ Մեր ստացիոնար բաժանմունքն աշխատել է 35 տոկոս ծանրաբեռնվածությամբ»,- նշեց մեր զրուցակիցը:
Հակատուրբերկուլյոզային բաժանմունքի լուծարման հետևանքով հիվանդները ստիպված են լինելու հասնել Աբովյան և բուժվել տեղի մասնագիտացված հիվանդանոցում։ Իսկ նրանք, ովքեր ստացիոնար բուժման կարիք չունեն, ամբուլատոր բուժում կանցնեն տեղամասային պոլիկլինիկաներում։
Օպտիմալացման հետևանքով շուրջ 20 աշխատակից դառնում է գործազուրկ, այդ թվում՝ բժիշկներ, բուժքույրեր, սանիտարներ, տեխնիկական աշխատողներ՝ խոհարար, հավաքարար, մատուցող։
Ըստ մարզպետարանի պատասխանատուի՝ աշխատակիցները տեղյակ են եղել գործընթացից, տեղի ունեցող քննարկումներից, հիմա էլ, ինչպես օրենքն է պահանջում, ծանուցվել են։ Իսկ օպտիմալացման գործընթացը մինչև տարվա վերջ կավարտվի։
«Ժամանակացույց է տրված, թե որ ժամանակահատվածում ինչ ենք անելու։ Կոնկրետ դեկտեմբերի 31-ով՝ վերջնաժամկետով, արդեն պետք է փոխենք նաև անունը՝ ինֆեկցիոն հակատուբերկուլյոզային հիվանդանոցը կդառնա ինֆեկցիոն»,- ասաց Շիրակի մարզպետարանի առողջապահության և սոցիալական ապահովության վարչության պետի պաշտոնակատարը։
Չ.Է.
