Աննա Հակոբյանին զրահապատ մեքենա չի սպասարկում․ վարչապետի աշխատակազմի ղեկավար․ ՏԵՍԱՆՅՈՒԹ

ԱԺ-ում այսօր կառավարության աշխատակազմի ղեկավար Էդուարդ Աղաջանյանից լրագրողները հետաքրքրվեցին կառավարական ամառանոցների վերանորոգման ծախսերից, որը քննադատության առարկա էր դարձել:

Ըստ մամուլի հրապարակումների՝ 2 մլն դոլար է ծախսվել վերանորոգման համար:

Հարցին՝ այդ տեղեկությունները համապատասխանո՞ւմ են իրականությանը, Աղաջանյանը պատասխանեց. «Վարչապետն ինքն իր համար ոչ մի բան չի գնել, որևէ գնում պետական գնումներ են և դրանք գնվում են պետության կարիքների համար: Վարչապետն իր համար որևէ գնում չի կատարում, այդ թվում՝ նաև Կոնդի առանձնատների վերանորոգման համար, որը պետության գույքն է: Ինչ վերաբերում է ծախսերին, այդ որոշումները գաղտնի ընթացակարգով են իրականացվում, որովհետեւ դա բխում է օրենքից: Երբ վերանորոգումը կլինի, պետռեգիստրում դրանց շուկայական արժեքը կավելանա»:

Հարցին՝ մեկ տարի առաջ ձեր իշխանության օրոք լրագրողներին տրամադրվել են տվյալներ, թե Սերժ Սարգսյանի օրոք քանի անգամ է այդ տունը վերանորոգվել և ինչքան գումար են ծախսել, հիմա ինչո՞ւ է խտրականություն դրսևորում, այդ օրենքն այն ժամանակ էլ կար, Աղաջանյանը պատասխանեց. «Մեր իշխանության օրոք, վստահ չեմ, կստուգեմ»:

Հստակեցնող հարցին՝ վարչապետի ամառանոցի վերանորոգման համար արդյո՞ք 2 մլն դոլար է ծախսվել, համապատասխանո՞ւմ է դա իրականությանը, թե՝ ոչ, այնուամենայնիվ, գոնե կարող է ասել՝ ճի՞շտ է, որ այդ ամառանոցից միայն պատերն են մնացել և ամեն ինչ՝ ինտերիեր, դիզայն, փոխվում է, Աղաջանյանը պատասխանեց. «Դա իրականությանը չի համապատասխանում: Կարող եմ ասել մի բան՝ այնտեղ թվով 8 տուն է վերանորոգվում, բոլոր տներից ամենաքիչ գումարը հատկացվել է վարչապետի առանձնատան համար»:

Այնտեղ այս պահին միայն վարչապետն ու ԱԺ նախագահ Արարատ Միրզոյանն են բնակվում, բայց Աղաջանյանն ասաց, որ այլ պաշտոնյաներ էլ են գալու:

Էդուարդ Աղաջանյանը հերքեց տեղեկությունները, որ վարչապետի տիկնոջ՝ Աննա Հակոբյանի համար զրահապատ մեքենա է գնվել:

Մանրամասները՝ տեսանյութում: