Արման Բաբաջանյանի ֆինանսական միջոցների օրինականությունը չի ստուգվի. Դատախազությունն ընթացք չի տալիս Վարդուհի Իշխանյանի դիմումին

ՀՀ ԱԺ պատգամավոր Արման Բաբաջանյանի ֆինանսական միջոցների օրինականությունն ստուգելու վերաբերյալ Վարդուհի Իշխանյանի հրապարակային դիմումին Դատախազությունն ընթացք չի տվել։ Այս մասին Factor.am-ին հայտնեցին ՀՀ գլխավոր դատախազությունից։

Հիշեցնենք, որ Հանրային խորհրդի նախագահ Վազգեն Մանուկյանի կինը՝ Վարդուհի Իշխանյանը հրապարակավ դիմել է Դատախազություն՝ առաջարկելով ստուգելու Արման Բաբաջանյանի ֆինանսական աղբյուրները։

«Դիմում եմ դատախազությանը, թող պարզի Բաբաջանյանի ֆինանսական աղբյուրները, որտեղից են շքեղ տունը, հարուստ ԶԼՄ-ն։ Դիմում եմ ԱԱԾ-ին, որ պարզի Բաբաջանյանի կապը օտարերկրյա ծառայությունների հետ։Եվ ուզում նաև պարզել, թե ինչպես եղավ, որ Բաբաջանյանը ու Հունանյանը 1998-ին աշխատել են միասին Կարեն Դեմիրճյանի շտաբում։ Ծիծաղում է նա, ով վերջինն է ծիծաղում․․․»,- ֆեյսբուքում նշել է նա։

«Ֆեյսբուքյան գրառմամբ Դատախազությանն ուղղված տիկին Իշխանյանի հրապարակային կոչը որևէ տվյալ չի պարունակում հնարավոր հանցավոր դրսևորումների, գույքի կամ ֆինանսական միջոցների ապօրինի ձեռքբերման մասին: Իսկ ՀՀ դատախազությունն առանց օրենքով նախատեսված հիմքի և առիթի որևէ անձի ֆինանսական աղբյուրները, գույքի ձեռքբերման հիմքերն ու օրինականությունն ստուգելու կամ նման գործընթաց նախաձեռնելու իրավասություն չունի»,- մեզ հետ զրույցում նշեց Գլխավոր դատախազությունից։

Նշենք, որ Գլխավոր դատախազությունն այսօր ընթացք էր տվել Արման Բաբաջանյանի՝ ահաբեկիչ, հոգեմետ դեղեր օգտագործող Նաիրի Հունանյանի հետ հանդիպման մասին հայտարարությունների մասին մամուլի հրապարակումներին և ուղարկել ԱԱԾ։