08.12.2025 | 23:30
Իլոն Մասկը կոչ է անում «վերացնել» ԵՄ-ն. Եվրահանձնաժողովին արգելվել է X-ում գովազդներ տեղադրել՝ 120 միլիոն եվրո տուգանքից հետո
Երաշխավորություն տվել եմ անձնական կարգավիճակով, ոչ որպես Արցախի ՄԻՊ․ Արտակ Բեգլարյանը՝ Արսեն Բաբայանի երաշխավորության մասին
Քաղաքականություն
29.10.2019 | 17:10
Իրավապաշտպան Ավետիք Իշխանյանը և Արցախի ՄԻՊ Արտակ Բեգլարյանը անձնական երաշխավորություն են ներկայացրել ԱԺ աշխատակազմի ղեկավարի նախկին տեղակալ Արսեն Բաբայանի նկատմամբ ընտրված խափանման միջոց կալանավորումը փոխելու համար։
Արցախի ՄԻՊ Արտակ Բեգլարյանը Factor.am-ին ասաց, երաշխավորություն ներկայացնելիս հանդես է եկել ոչ թե որպես Արցախի ՄԻՊ, այլ որպես Արսեն Բաբյանի ընկեր․ «Ես՝ որպես Արսեն Բաբայանի ընկեր և նրան լավ ճանաչող անձ, և նաև հաշվի առնելով այն, որ նա իր խնամքին ունի երկու մանկահասակ երեխա երաշխավորություն եմ տվել և իմ խոսքով, և օրենքի սահմանած ձևով՝ դրամական միջոցներով»։
Բեգլարյանը հրաժարվեց Բաբայանին առաջադրված մեղադրանքի վերաբերյալ կարծիք հայտնել․ «Ես կխուսափեմ գնահատակ տալուց, գնահատական թող տա դատարանը։ Ես իմ անձնական կարծիքն ունեմ, որը կհայտնեմ Արսեն Բաբայանին, որպես իմ ընկերոջ։ Բացի այս, իմ գնահատականները կարող են ասոցացվել իմ ներկայիս կարգավիճակի՝ Արցախի ՄԻՊ-ի պաշտոնի հետ, բայց նշեմ, որ ես երաշխավորություն տվել եմ անձնական կարգավիճակով ոչ որպես Արցախի ՄԻՊ»։
Ազգային ժողովի աշխատակազմի ղեկավարի նախկին տեղակալ Արսեն Բաբայանին, հիշեցնենք, մեղադրանք է առաջադրվել իշխանությունը յուրացնելուն օժանդակելու և պաշտոնատար կեղծիք կատարելու համար։ Հոկտեմբերի 24-ին Բաբայանը կալանավորվել է։
Լիլիթ Շաբոյան
