10.12.2025 | 21:53
Լիանա Թովմասյանը՝ Միասնական սոցիալական ծառայության պետի տեղակալ
Ճանապարհային երթևեկության կանոնների խախտման հետևանքով պետությունը վնասներ է կրում. վարչապետի հանձնարարականը
Տնտեսություն
05.10.2017 | 12:09
ՀՀ Կառավարության այսօրվա նիստում վարչապետ Կարեն Կարապետյանը հանձնարարականներ տրվեց ՏՏ ոլորտի աջակցման գործիքների զարգացման վերաբերյալ: Կարապետյանն ընդգծեց՝ վերջերս կայացած «Դիջիթեք էքսպո-2017»-ի ընթացքում կրկին արձանագրվեց ՀՀ-ում տեղեկատվական տեխնոլոգիաների զարգացման և արտահանման ներուժը:
Միաժամանակ, ըստ կառավարության ղեկավարի, ՏՏ ոլորտում նոր գաղափարներ և ծրագրային լուծումներ ունեցող սկսնակ, փոքր և միջին ընկերությունները հաճախ աջակցության կարիք ունեն:
«Մասնավորապես, նոր շուկաներ մուտքի, գործարար կապերի հաստատման, վաճառքի, մարքեթինգի հմտությունների զարգացման և համապատասխան դասընթացների իրականացման անհրաժեշտություն կա: Հաշվի առնելով վերոնշյալը՝ հանձնարարում եմ տրանսպորտի, կապի և ՏՏ նախարարներին, ինչպես նաև Ռազմավարական նախաձեռնությունների կենտրոնին և Հայաստանի զարգացման հիմնադրամի գործադիր տնօրեններին մեկամսյա ժամկետում համատեղ մշակել և կառավարության աշխատակազմ ներկայացնել ՏՏ ոլորտի արտահանման, գործարար հմտությունների և կարողությունների զարգացման համար անհրաժեշտ միջոցառումների ծրագիր՝ համապատասխան գործիքների նախատեսմամբ»,- հանձնարարեց Կարեն Կարապետյանը:
Գործադիրի ղեկավարն ասաց՝ այս ոլորտում մեծ ներուժ և լավ գաղափարներ կան՝ լավ պրոդուկտ ստանալու համար: «Այն վաճառելու պրոբլեմ ունենք, և այստեղ պետք է հստակ բիզնեսի կողքին կանգնենք»,- հավելեց Կարապետյանը:
Վարչապետի մյուս հանձնարարականը վերաբերում էր ճանապարհային երթևեկության կանոնների խախտման հետևանքով պետությանը պատճառված վնասի հատուցման ապահովմանը: Վարչապետի խոսքով՝ ճանապարհային երթևեկության կանոնների խախտման հետևանքով բազմաթիվ դեպքերում վնասվում են ճանապարհի երթևեկության անվտանգությունն ապահովող տարրերը՝ ճանապարհային նշանները, լուսացույցները, համապատասխան սյուները և այլն:
«Չնայած օրենքով սահմանված կարգավորումներին, գործնականում գրանցվում են դեպքեր, երբ նշված տարրերի վերանորոգման ու վերականգնման ծախսերի համար փոխհատուցումները չեն հավաքագրվում: Խնդիրը հիմնականում պայմանավորված է նման դեպքերի արձանագրման խիստ հսկողության ոչ լիարժեք իրացմամբ»,- նշեց Կառավարության ղեկավարը:
Հաշվի առնելով վերոնշյալը՝ վարչապետը հանձնարարեց տրանսպորտի, կապի, ՏՏ, տարածքային կառավարման և զարգացման նախարարներին մեկամսյա ժամկետում գույքագրել ճանապարհային կահավորանքի պատճառված վնասի դեպքերը և ստացված փոխհատուցման շրջանակներում ձեռնարկել միջոցառումներ դրանց վերականգնման ուղղությամբ: Վարչապետն ընդգծեց՝ ըստ անհրաժեշտության պետք է քննարկել նաև իրավական ակտի նախագծի մշակման հարցը:
Շողիկ Գալստյան
