ՍԴ-ն ԱԺ-ին զրկել է լիազորությունից, գործ ունենք սահմանադրական անվտանգության խաթարման հետ. Վլադիմիր Վարդանյան. ՏԵՍԱՆՅՈՒԹ

Սահմանադրական դատարանի հետ կապված հարցը փակուղի չի տանելու, սակայն դրա պատճառով կարող է սահմանադրության անվտանգության խնդիր լինել: Այսօր ԱԺ-ում լրագրողների հետ զրույցում նման հայտարարություն արեց ԱԺ «Իմ քայլը» խմբակցության պատգամավոր, պետաիրավական հարցերի մշտական հանձնաժողովի նախագահ Վլադիմիր Վարդանյանը՝ անդրադառնալով ՍԴ-ի կողմից ԱԺ դիմումի մերժմանը։

«Չեմ ընդունում այն տարբերակը, որ բոլոր հարցերում մենք ունենք փակուղի: Չկա փակուղի, բայց ցանկացած պետական մարմին պետք է գործի այնպես, որպեսզի խուսափի ճգնաժամերից և սահմանադրական անվտանգությանը սպառնացող վտանգներից»,- ասաց նա։

Վարդանյանը շեշտեց, որ հետ քայլ չի լինելու սահմանադրական արդարադատության տեսանկյունից։ Ասաց՝ պետական մարմինները պարտավոր են իրականացնել միայն այնպիսի գործողություններ, որոնցով լիազորված են օրենսդրությամբ։

«ՍԴ-ն, չունենալով վերադաս մարմին, այդուհանդերձ ունի պարտավորություն՝ չշեղվել իր սահմանադրական պարտականությունից: Սահմանադրական առաքելությունը նշանակում է, որ պետք է գործես քո լիազորությունների շրջանակում, իսկ ՍԴ-ն պետք է ճգնաժամերը լուծի, այլ ոչ թե խորացնի»,- նշեց Վարդանյանը:

Պատգամավորը մտահոգված է ՍԴ որոշման հիմքում դրված հիմնավորումների առիթով. «Խորապես մտահոգված եմ այն մեկնաբանությամբ, որը տրվել է ՍԴ-ի կողմից՝ կապված այն հարցի հետ, որ մինչև ՍԴ-ն համապատասխան որոշում չկայացնի, ԱԺ-ն չի կարող էական կարգապահական հիմքով դիմել ՍԴ, որովհետև սա նշանակում է, որ ՍԴ-ն առանց համապատասխան խնդրանքի մեկնաբանել է օրենքը և այնպիսի մեկնաբանություն է տվել, որ այս օրենքը հակասող է Սահմանադրությանը: ՍԴ-ն, ըստ էության, այս որոշմամբ զրկել է ԱԺ-ին իր լիազորություններից մեկից։ Մենք գործ ունենք մի իրավիճակի հետ, երբ սահմանադրական անվտանգությունն ու արդարադտությունը կարող են վտանգված լինել»,- շարունակեց Վարդանյանը:

Ինչ վերավերում է ՍԴ նախագահ Հրայր Թովմասյանի հորը և դուստրերին ԱԱԾ հրավիրելուն, Վլադիմիր Վարդանյանն նշեց, որ չի ցանկանում մեկնաբանել քննչական մարմինների գործողությունները, քանի որ չի կարելի մեկնաբանել որևէ իրավական գործընթաց, որի մանրամասներին ծանոթ չես:

Մանրամասները՝ տեսանյութում:

Նարեկ Կիրակոսյան