Շիրակի դատախազը դիմել է մարզպետին՝ Անիի ՀՀԿ-ական համայնքապետի լիազորությունները դադարեցնելու համար. նա մեղադրվում է չարաշահումների համար

Շիրակի մարզի դատախազ Կարեն Գաբրիելյանը միջնորդություն է ներկայացրել Շիրակի մարզպետ Տիգրան Պետրոսյանին ու տարածքային կառավարման և ենթակառուցվածքների նախարար Սուրեն Պապիկյանին՝ Անիի համայնքապետ Արտակ Գևորգյանի լիազորությունները ժամանակավոր  դադարեցնելու համար։ Այս մասին Factor.am-ին փոխանցեցին ՀՀ գլխավոր դատախազությունից։

Նշենք, որ Անի խոշորացված համայնքի ՀՀԿ-ական ղեկավար Արտակ Գևորգյանին մեղադրանք է առաջադրվել ՀՀ քրեական օրենսգրքի 179-րդ հոդվածի 2-րդ մասի 1-ին և 3-րդ կետերով, 314-րդ հոդվածի 1-ին մասով,  պաշտոնական դիրքն օգտագործելով՝ խոշոր չափերի գումար վատման եղանակով հափշտակելու, ինչպես նաև պաշտոնական կեղծիք կատարելու մեջ։ Առաջադրված այս մեղադրանքները վերջերս լրացվեցին այլ ապօրինություններով, որոնց մասին ՀՀ Ոստիկանությունը   հայտարարություն էր տարածել։

Համայնքապետի լիազորությունների դադարեցման միջնորդությունն ուղարկվել է նաև Անիի համայնքապետարան, որի ավագանին աջակցություն է հայտնել Արտակ Գևորգյանին։

«Ղեկավարվելով «Տեղական ինքնակառավարման մասին» Հայաստանի Հանրապետության օրենքի 18-րդ հոդվածի 1-ին մասի 42-րդ կետի դրույթներով՝ Հայաստանի Հանրապետության Շիրակի մարզի Անի համայնքի ավագանին որոշում է.

Տեղական ինքնակառավարման ոլորտը կարգավորող օրենսդրությունը չի նախատեսում «համայնքի ղեկավարի պաշտոնավարության ժամանակավոր դադարեցման» ինստիտուտ։

«Տեղական ինքնակառավարման մասին» Հայաստանի Հանրապետության օրենքը նախատեսում է միայն «համայնքի ղեկավարի լիազորությունների վաղաժամկետ դադարեցման» ինստիտուտ /հոդված 26/, ուստի ելնելով վերոգրյալից՝ պարզ է դառնում, որ պաշտոնավարությունը ժամանակավոր դադարեցնելու մասին որոշումը կատարելու որևէ օրենսդրական նորմ և ընթացակարգ չի գործում։ Հայաստանի Հանրապետության Շիրակի մարզի Անի համայնքի ավագանին  հայտնում է իր դժգոհությունը  այն որակելով որպես քաղաքական  հետապնդում և տալիս իր վստահությունն ու աջակցությունը Հայաստանի Հանրապետության Շիրակի մարզի Անի համայնքի ղեկավար Արտակ Գևորգյանին»,- նշվում է ավագանու որոշման մեջ։

Ավելի վաղ մեզ հետ զրույցում Արտակ Գևորգյանը նշել էր, որ չի ընդունում իրեն առաջադրված մեղադրանքները: «Ես չեմ ընդունում այդ հանգամանքը և փաստը, դա իմ կողմից ընդունելի չէ, սա քաղաքական հետապնդում է։  Համայնքապետի պաշտոնից էլ չեմ պատրաստվում հրաժարական տալ։ Սա ճնշում է դրա համար և հրաժարական չի կարող լինել»,- ասել էր Անիի համայնքապետը։

Նրա փաստաբան Արամայիս Հայրապետյանն էլ մեղադրանքը որակել էր քաղաքական ու իրականությունից հեռու. «Սա միանշանակ քաղաքական մեղադրանք է: Տևական ժամանակ, որպես նախկին իշխանության ներկայացուցիչ, նրանից պահանջում են տարբեր մակարդակներով հրաժարական տալ։ Տեսան, որ հրաժարական չի տալիս մեղադրանք առաջադրին, որը որևէ քննադատության չի դիմանում»:

Հիշեցնենք, որ թավշյա հեղափոխությունից հետո Անի համայնքի բնակիչները պարբերաբար բողոքի ակցիաներ են կազմակերպում՝ պահանջելով Գևորգյանի հրաժարականը։Նրանք նույնիսկ փակել էին համայնքապետարանի դուռը և հրաժարականի պահանջով ստորագրահավաք սկսել։