ՀՀ ղեկավարի կազմի առաջին դեմքերը գործուղման մեջ են. ովքե՞ր են փոխարինում նրանց

ՀՀ ղեկավար կազմի առաջին դեմքերն այս օրերին գործուղումների մեջ են: Վարչապետ Նիկոլ Փաշինյանն աշխատանքային այցով ԱՄՆ-ում է. նա Նյու Յորքում մասնակցելու է ՄԱԿ-ի Գլխավոր վեհաժողովի 74-րդ նստաշրջանի աշխատանքներին, իսկ մինչ այդ հանդիպումներ է ունեցել Լոս Անջելեսում:

ՀՀ նախագահ Արմեն Սարգսյանն Իտալիա է մեկնել: Հռոմում նա մասնակցելու է կիբերանվտանգության ոլորտում միջազգային հեղինակավոր Cybertech համաժողովին:

ԱԺ նախագահ Արարատ Միրզոյանն էլ Ղազախստանի մայրաքաղաք Նուր Սուլթանում մասնակցում է Եվրասիայի երկրների խորհրդարանների խոսնակների 4-րդ համաժողովին:

Վարչապետի բացակայության դեպքում նրան փոխարինում է փոխվարչապետերից մեկը: Այս դեպքում Նիկոլ Փաշինյանին փոխարինում է Տիգրան Ավինյանը: Սահմանադրության համաձայն՝ ՀՀ նախագահի բացակայության դեպքում պետության ղեկավարի լիազորությունները ստանձնում է ԱԺ նախագահը:

Սահմանադրության 144 հոդվածի համաձայն՝ ՀՀ նախագահի պաշտոնանկության, լիազորությունների կատարման անհնարինության, հրաժարականի կամ մահվան դեպքերում, մինչև նորընտիր Հանրապետության նախագահի կողմից պաշտոնի ստանձնումը, նախագահի լիազորությունները կատարում է Ազգային ժողովի նախագահը:

Factor.am-ը սահմանադրագետ Վարդան Այվազյանից հետաքրքրվեց՝ արդյո՞ք նշյալ հոդվածը տարածվում է նաև ՀՀ նախագահի գործուղումների վրա, և եթե այո, ապա այս դեպքում ո՞վ է փոխարինում նախագահին, երբ ԱԺ նախագահը ևս գործուղման մեջ է:

«Այսօր, եթե փաստացի երկրում չեն գտնվում, դա չի նշանակում, որ ինչ-որ մեկը պետք է նրանց փոխարինի: Մենք ապրում ենք տեխնոլոգիական առաջընթացի դարում: ՌԴ-ի, ԱՄՆ-ի նախագաները կարողանում են իրենց երկիրը ինքնաթիռից կառավարել՝ 24-ժամյա ռեժիմով: Հանրապետությունից դուրս գտնվելը ոչ մի նշանակություն չունի, նա իր պաշտոնավարումը շարունակում է»,- մեկնաբանեց սահմանադրագետը:

Նարեկ Կիրակոսյան