«Պարոն Վանեցյանը չի կարող մեր կառավարության մասին կոռուպցիոն փաստեր հրապարակել». Վահագն Հովակիմյան. ՏԵՍԱՆՅՈՒԹ

Factor.am-ի հարցազրույցը ՀՀ ԱԺ «Իմ քայլը» խմբակցության պատգամավոր Վահագն Հովակիմյանի հետ

-Երեկ վարչապետը Լոս Անջելեսում մամուլի ասուլիսի ժամանակ ԱԱԾ նախկին տնօրեն Արթուր Վանեցյանի հրաժարականի տեքստը բնորոշել էր անարգանք սպայի պատվին։ Պարոն Վանեցյանն այսօր հակադարձել է՝ Փաշինյանը խոսում է բաներից, որոնցից քիչ է հասկանում։ Ի՞նչ է տեղի ունեցել նրանց միջև, որ բանը հասել է այսպիսի հակամարտության։

-Եթե աշխարհի որևէ երկրում տեսնեք հատուկ ծառայության պաշտոնանկ արված ղեկավարի, որը հետո քաղաքական հայտարարություն է անում, չկա նման բան: Ես ցավում եմ պարոն Վանեցյանի համար, բայց ինքն իր վարքով խորը հիասթափություն է առաջացնում։ Սպայի պատիվ ասվածն ի՞նչ է։ Ամենակարևորն այն է, որ Գերագույն գլխավոր հրամանատարի հրամանները լուռ կատարել։

-Կա՞ն կասկածներ, որ ԱԱԾ տնօրենի պաշտոնում նա աշխատել է ընդդեմ իշխանությունների։

-Ես դա չգիտեմ, չեմ ուզում այդ հարցի մեջ մտնել։ Այն, ինչ տեղի ունեցավ իր հրաժարականից հետո, վատ երևույթ էր։ Դա սպային պատիվ չէր բերում։

-Պարոն Վանեցյանն ակնարկում է, որ իր և Փաշինյանի պատկերացումները սպայի մասին տարբեր են։

-Հենց դրա մասին եմ ասում։ Սպայի համար ամենամեծ պատիվն իր Գերագույն գլխավոր հրամանատարի հրամանները կատարելն է։

-Ինքն ասում է, որ խաղաղության ժամանակ Գերագույն գլխավոր հրամանատարը վարչապետը չէ։

-Պետք է նայել Սահմանադրությունը։ Այն, որ ասում է, թե խաղաղության ժամանակ պաշտպանության նախարարն է զորքերի հրամանատարը, դա ԱԱԾ տնօրենի վրա չի տարածվում։ ԱԱԾ տնօրենի Գերագույն գլխավոր հրամանատարը հանրապետության վարչապետն է, գործատուն, աշխատանքի ընդունողն ու ազատողը։

-Պարոն Վանեցյանը սպառնում է խոսել։ Եթե նա պիտի ասի բաներ, որոնք ասելու չեն, նշանակում է՝ պիտի հրապարակի կոռուպցիոն ինչ-որ փաստե՞ր։

-Այն, որ մեր քաղաքական թիմի հետ կապված երբեք չի կարող լինել կոռուպցիոն որևէ պատմություն, երկրորդ կարծիք չկա։ Կարելի է ճանճի տզզոցն այլ կերպ ներկայացնել։ Այստեղ դա պատիվ չի բերի նրան։

-Հրաժարականից հետո նա գնացել է Մոսկվա։ Կա՞ օրենք, որը կարգավորում է գաղտնի փաստաթղթերի հասանելիություն ունեցող մարդկանց երկրից դուրս գալու իրավունքն ու պարտականությունները հրաժարականից հետո:

-Ճիշտն ասած՝ չէ։ Դա ևս օրենսդրական բաց է, որն առաջիկայում պետք է ուսումնասիրել և հասկանալ։ Աշխարհի փորձն է պետք նայել։ Մենք այդ խնդիրն ունենք։ Մենք ունեինք պաշտպանության նախարար, որն այլ երկրի քաղաքացի էր, մենք ունեինք գլխավոր դատախազի տեղակալ, որը պաշտոնանկությունից հետո աշխատանքի անցավ այլ երկրում։ Այդ հարցին պետք է օրենսդրական դաշտում անդրադառնանք։ Իսկապես դա պետական անվտանգության հարց է, երբ պետական գաղտնիքին մուտք ունեցող մարդիկ թողնում գնում են, ինչը կարող է հարվածի տակ դնել ՀՀ-ն

Հարցազրույցն ամբողջությամբ՝ տեսանյութում:

Մհեր Արշակյան