Չենք ուզում հավատալ, որ Ամուլսարի հարցով հակաժողովրդավարական որոշում կկայացվի. Ջերմուկի բնակիչ. ՏԵՍԱՆՅՈՒԹ

Բնապահպանական մոբիլիզացիայի օրը հասավ նաև Ջերմուկ, որտեղ դասադուլ և գործադուլ էին հայտարարել։ Դպրոցներից աշակերտները երթով շարժվեցին քաղաքի հրապարակներից մեկը, նրանց էին միացել նաև հյուրանոցների, առողջարանների աշխատակիցներ։

Ամեն ինչ չէ, որ հարթ ընթացավ։ Ջերմուկի դպրոցներից մեկում խոչընդոտում էին աշակերտների ելքը: Վերջինների պատմելով՝ իրենց զգուշացրել էին ձեռնպահ մնալ դասադուլից։ Տնօրեն Արմինե Արսենյանն անձամբ էր շենքի մուտքի մոտ հսկում իրադրությունը: Տնօրենին հարցրեցինք ճնշումների մասին, բայց պատասխանը կոշտ էր. նա դուռը փակեց ու «հրահանգեց» հեռանալ։

Դասադուլը խափանել, սակայն, չստացվեց։ Աշակերտները Ջերմուկի Ձախափնյա թաղամասից երթ իրականացրին:

Ջերմուկցիները մեկ անգամ ևս վերահաստատեցին նախկինում բազմիցս հնչեցրած տեսակետը. եթե փորձ արվի մուտք գործել Ամուլսարի տարածք, անգամ ընտանիքներով կգնան, կկանգնեն, բայց թույլ չեն տա։ Դասադուլն ու գործադուլը դադարեցվեցին:

«Դադարեցրինք այսօր ակցիաները, բայց կարծում եմ՝ Կառավարության կողմից էլ պետք է լինի մեսիջ, որովհետև այս մարդիկ հոգնել են։ Եթե պարզվի, որ այս ձմեռ էլ մարդիկ պիտի այստեղ մնան, հաստատ հանրային տրամադրվածությունը կփոխվի։ Լիդիանի մուտքն Ամուլսարի տարածք պետք է բացառվի: Այս անորոշ վիճակին պետք է վերջ տալ», – ասաց Ջերմուկ քաղաքի բնակիչ Շիրակ Բունիաթյանը։

Նա նշեց, որ վստահում են Նիկոլ Փաշինյանին և չեն ուզում հավատալ, որ Ամուլսարի հարցով հակաժողովրդավարական որոշում կկայացվի։

Մանրամասները՝ տեսանյութում:

Ռոբերտ Անանյան