12.11.2024 | 23:27
Գրետա Թունբերգը ժամանել է Հայաստան
Սպիտակ տունը սպառնացել է պատասխանել Սաուդյան Արաբիայի նավթային օբյեկտների վրա հարձակմանը
Քաղաքականություն
16.09.2019 | 14:33
ԱՄՆ-ն ենթադրում է, թե ով է կանգնած Սաուդյան Արաբիայի նավթային օբյեկտների վրա հարձակման հետևում, և պատրաստ է վճռական գործողությունների: ՌԻԱ Նովոստիի փոխանցմամբ՝ այս մասին Twitter-ում գրել է ԱՄՆ նախագահ Դոնալդ Թրամփը:
«Բայց ցանկանում ենք թագավորությունից լսել, թե, նրանց կարծիքով, ով է հարձակումն իրականացրել և ինչ պայմաններով մենք պետք է գործենք»,- գրել է Թրամփը:
Washington Post-ն իր հերթին գրել է, որ Թրամփի վարչակազմը դիտարկել է «ռազմական պատասխանի» հնարավորությունը, չնայած Պենտագոնում «ոմանք զսպվածության կոչ են արել»: Այս հարցով ԱՄՆ նախագահը երեկ նաև հանդիպում է անցկացրել պաշտպանության նախարար Մարկ Էսպերի հետ, սակայն հանդիպման մանրամասների մասին ոչինչ հայտնի չէ:
Նշենք, որ Սաուդյան Արաբիայի նավթային օբյեկտների վրա շաբաթ իրականացված հարձակման պատասխանատվությունը ստանձնել են եմենցի հուսի ապստամբները, որոնց դեմ պայքարում է արաբական կոալիցիան՝ Սաուդյան Արաբիայի գլխավորությամբ: Ենթադրվում է, որ հարձակումն իրականացվել է անօդաչու սարքերի օգնությամբ:
ԱՄՆ պետքարտուղար Մայք Պոմպեոն, սակայն, հայտարարել է՝ վկայություններ չկան, որ հարձակումն իրականացվել է Եմենի կողմից, և միջադեպի համար մեղադրել է Թեհրանին: Իրանի ԱԳՆ-ն իր հերթին հերքել է Պոմպեոյի մեղադրանքները՝ դրանք կեղծիք անվանելով:
Հավելենք, որ հարձակումից հետո Սաուդյան Արաբիան, որը երեք խոշորագույն նավթ արտադրողներից է, ինչպես նաև խոշորագույն արտահանողը, ավելի քան 2 անգամ կրճատել է նավթի արտադրությունը: Արդյունքում հումքի համաշխարհային գները միջինը 12-13%-ով աճել են:
