Քաղաքականություն
05.09.2019 | 14:15ՀՀ Ազգային ժողովի արտաքին հարաբերությունների մշտական հանձնաժողովի այսօրվա նիստում քննարկվում է «2002 թվականի հոկտեմբերի 7-ի Հավաքական անվտանգության մասին պայմանագրի կազմակերպության կանոնադրությունում փոփոխություններ կատարելու մասին» երկրորդ արձանագրությունը վավերացնելու մասին հարցը։
Ըստ այս արձանագրության՝ ՀԱՊԿ խորհրդի կազմի մեջ են մտնում պետությունների ղեկավարները և պետությունների կառավարությունների ղեկավարները: Նշենք, որ մինչ այս արձանագրության վավերացումը՝ ՀԱՊԿ խորհրդի կազմի մեջ մտնում էին միայն կազմակերպության անդամ պետությունների ղեկավարները։
Արտաքին հարաբերությունների հանձնաժողովի օրակարգում ընդգրկված մեկ այլ նախագծով՝ «2002 թվականի հոկտեմբերի 7-ի Հավաքական անվտանգության մասին պայմանագրի կազմակերպության կանոնադրությունում փոփոխություններ կատարելու մասին» երրորդ արձանագրությունը վավերացնելու հարցով կարգավորվում է ՀԱՊԿ-ում դիտորդ և գործընկեր պետության կարգավիճակի հարցը։
«Մինչև այժմ կար դրույթ, որ կարող է լինել դիտորդ պետություն, այժմ կարգավորվում է նաև գործընկեր պետության կարգավիճակի հարցը»,- ասաց նախագծերը ներկայացնող ՀՀ ԱԳ փոխնախարար Շավարշ Քոչարյանը՝ նշելով, որ որևէ պետություն չի կարող ստանալ դիտորդի և գործընկերոջ կարգավիճակ՝ առանց ՀԱՊԿ անդամ բոլոր պետությունների համաձայնության:
Նախագծի վերաբերյալ ԱԺ «Լուսավոր Հայաստան» խմբակցության պատգամավոր Արման Բաբաջանյանը նշեց՝ արդյո՞ք հայկական կողմից գնահատվել է այն ռիսկը, որ Ադրբեջանը կարող է գնալ ստվերային պայմանավորվածությունների՝ դառնալով գործընկեր կամ դիտորդ պետություն՝ հաշվի առնելով ՌԴ-ի հետ այդ պետության ռազմավարական գործընկերությունը։
Շավարշ Քոչարյանը պատասխանեց, որ Ադրբեջանը բուն ՀԱՊԿ-ում ունի միջնորդավորված ազդեցություն, ՀԱՊԿ-ն ունի պայմանագիր, որով կաշկանդված են անդամ բոլոր պետությունները, իսկ այդ պետությունների միջև արդեն գոյություն ունեցող երկկողմ պարտավորությունները չպետք է հակասեն ՀԱՊԿ պայմանագրին, իսկ այս առումով ՀՀ-ն որոշիչ ձայն ունի։ Ըստ փոխնախարարի՝ Հայաստանը «ոչ» ասելու հնարավորություն ունի:
Մանրամասները՝ տեսանյութում:
Աղավնի Սուքիասյան
