Գիշերօթիկ դպրոցների լուծարումը կարող է հանգեցնել մուրացկանության թվի աճի. կրթության ոլորտի փորձագետ

Աշխատանքի և սոցիալական հարցերի նախարարությունը հանրային քննարկման  է ներկայացրել կառավարության որոշման մեջ փոփոխություն կատարելու նախագիծ: Նախատեսվում է լուծարել «Դիլիջանի երեխաների խնամքի և պաշտպանության գիշերօթիկ հաստատություն», «Բյուրեղավանի երեխաների խնամքի և  պաշտպանության գիշերօթիկ հաստատություն», «Գյումրու Ֆրիտյոֆ Նանսենի անվան երեխաների խնամքի և պաշտպանության N 2 գիշերօթիկ հաստատություն», «Գյումրու երեխաների խնամքի և պաշտպանության  N 1 գիշերօթիկ հաստատություն» պետական ոչ առևտրային կազմակերպությունները:

Հանրապետական մանկավարժահոգեբանական կենտրոնի տնօրեն, կրթության ոլորտի փորձագետ Արմինե Դավթյանի համոզմամբ՝ գիշերօթիկ հաստատությունում ապահով խնամք են ստանում սոցիալապես անապահով ընտանիքների երեխաներ, հետևաբար հարց է առաջանում, արդյոք ճի՞շտ մոնիթորինգ է իրականացվել՝ նախքան նման որոշում կայացնելը:

«Եթե խոսքը գնում է երեխայի իրավունքների վրա հիմնված գործընթացի, երեխայի՝ ընտանիքում մեծանալու իրավունքի մասին, ապա պետք է նախ լուրջ վերլուծություն անել՝ հասկանալու համար, որքանով  են պատրաստ իրենց երեխաներին գիշերօթիկ դպրոց ուղարկած ընտանիքները երեխաներին հետ ընդունել: Եթե դիտարկում ենք հատուկ դպրոցներ հաճախող որոշ երեխաների ընտանիքները, ապա տեսնում ենք, որ ի տարբերություն հատուկ դպրոցների, գիշերօթիկ դպրոցներ հաճախող երեխաների մեծ մասը սոցիալապես անապահով ընտանիքի երեխաներ են, ուստի այստեղ մեծ է վտանգը, որ երեխաները կարող են հայտնվել փողոցում»,- ասաց  Դավթյանը:

Վերջինիս խոսքով՝ չի բացառվում, որ «Բյուրեղավանի երեխաների խնամքի և  պաշտպանության գիշերօթիկ հաստատություն», «Գյումրու Ֆրիտյոֆ Նանսենի անվան երեխաների խնամքի և պաշտպանության N 2 գիշերօթիկ հաստատություն», «Գյումրու երեխաների խնամքի և պաշտպանության  N 1 գիշերօթիկ հաստատություն» պետական ոչ առևտրային կազմակերպությունները լուծարելու արդյունքում  ունենանք մուրացկանության թվի և շեղվող վարքի դրսրևորումներով երեխաների քանակի աճ: