Ինչպե՞ս կարող է 50 դատապարտյալին հսկող ընդամենը մեկ աշխատակիցը նրանցից պատշաճ վարքագիծ պահանջի. ՄԻՊ ներկայացուցիչ. ՏԵՍԱՆՅՈՒԹ

Քրեակատարողական ենթամշակույթը ծաղկում է ապրում քրեակատարողական հիմնարկներում, որովհետև այնտեղ կան դրա համար նպաստավոր պայմաններ. օրինակ՝ նման ենթամշակույթ կրողները կարողանում են լուծել սոցիալական ինչ-ինչ հարցեր, որի համար էլ հենց նրանց են սկսում այս կամ այն հարցով դիմել, ուստի ՔԿՀ-ներում շատ լուրջ ծառայություն պետք է իրականացվի:

Այս մասին այսօր «Կառավարությունն ընդունեց քրեական ենթամշակույթ ստեղծելը քրեականացնող օրինագիծ․իրավական գնահատականներ» թեմայով քննարկման ժամանակ ասաց ՄԻՊ աշխատակազմի՝ կանխարգելման ազգային մեխանիզմի իրականացման համակարգող-խոշտանգումների և վատ վերաբերմունքի կանխարգելման վարչության պետ Գոհար Սիմոնյանը:

ՄԻՊ ներկայացուցչի խոսքով՝ ՔԿՀ-ներում քրեական ենթամշակույթը վերացնելու համար կարևոր է իրականացնել բազմապրոֆիլ այլ լծակներ:

Ըստ նրա՝ նման պայքար հնարավոր չէ իրականացնել, օրինակ, առանց ՔԿՀ-ներում աշխատողների սոցիալական երաշխիքների տրամադրման և  աշխատավարձերի վերանայման:

«Դժվար է պատկերացնել, ինչպես կարող է  ՔԿՀ-ի մի շենքում պահվող  ազատությունից զրկված մինչև 50 անձի հսկող ընդամենը մեկ աշխատակիցը նրանցից պահանջի պատշաճ վարքագիծ»,- ասաց  Սիմոնյանը:

Սիմոնյանի խոսքով՝ տարիներ ի վեր քրեակատարողական ծառայությունում լուրջ խնդիր է որակյալ, պրոֆեսիոնալ և գիտակից կադրեր ներգրավելը՝ բժշկական սպասարկման, սոցիալ-հոգեբանական և այլ ծառայությունների համար։

«Մարդիկ ցանկություն չունեն աշխատելու համակարգում՝ աշխատավարձի, սոցիալական երաշխիքների, աշխատանքային պայմանների և անվտանգության տեսանկյունից։ Այս խնդիրը լուծելու համար կարևոր է կադրերի համալրման գործուն մեխանիզմի ստեղծումը»,- ասաց նա:

Մանրամասները՝ տեսանյութում:

Աղավնի Սուքիասյան