Կառավարությունը 22 մլն դոլարի ներդրումային ծրագրերի հարկային արտոնություն տվեց․ ՏԵՍԱՆՅՈՒԹ

Կառավարությունը օգոստոսի 22-ի նիստում հարկային արտոնություն տվեց «ԱՖԱ» սահմանափակ պատասխանատվությամբ ընկերությանը, որը նախատեսում է արգելակման կոճղակների արտադրություն սկսել Երևանում:

Նախատեսվում է ծրագրի շրջանակում իրականացնել 300 մլն ՀՀ դրամի ներդրում`ստեղծելով 55 նոր աշխատատեղ՝ 150 000 ՀՀ դրամ միջին աշխատավարձով։

Ծրագրով նախատեսված արտադրանքի ընդհանուր ծավալը կկազմի 770 մլն ՀՀ դրամ, որից 200 մլն ՀՀ դրամի արտադրանքը կիրացվի ՀՀ տարածքում, 530 մլն ՀՀ դրամի արտադրանքը` ԵՏՄ անդամ երկրների տարածքում, 40 մլն ՀՀ դրամի արտադրանքը` երրորդ երկրների տարածքում:

Կառավարության մեկ այլ որոշմամբ՝  հարկային արտոնություն ստացավ «Լենտեքս»  ընկերությունը, որը զբաղվում է գուլպաների, զուգագուլպաների, տրիկոտաժի արտադրությամբ և թելերի վերամշակմամբ։ Ծրագրի շրջանակում նախատեսվում է իրականացնել 3-4 մլրդ ՀՀ դրամի ներդրում, ստեղծել 50-60 նոր աշխատատեղ՝ 90 000 ՀՀ դրամ միջին աշխատավարձով։

Արտադրանքի նախատեսված ծավալները ծրագրի ընթացքում կկազմեն մոտ 4,5 մլրդ ՀՀ դրամ, որից մոտ 1,4 մլրդ ՀՀ դրամը կիրացվի ՀՀ տարածքում, մոտ 3,1 մլն ՀՀ դրամը՝ ԵՏՄ անդամ այլ երկրներում։

Կառավարությունը հարկային արտոնություն տվեց նաև «ՊՐՈՖ ԱԼ» սահմանափակ պատասխանատվությամբ ընկերությանը, որը զբաղվում է ալյումինե դռների, պատուհանների և կոնստրուկցիաների արտադրությամբ։

Նախատեսվում է ծրագրի շրջանակներում իրականացնել 1 000 000 000 ՀՀ դրամի ներդրում: Ներկայումս առկա է 281 աշխատատեղ: Նախատեսվում է ներդրումային ծրագրի շրջանակում ստեղծել 50 նոր աշխատատեղ՝ 280 000 ՀՀ դրամ միջին աշխատավարձով։

Ծրագրով նախատեսված արտադրանքի ընդհանուր ծավալը կազմում է 20 000 000 000 ՀՀ դրամ, որից 12 000 000 000 ՀՀ դրամի արտադրանքը կիրացվի ՀՀ տարածքում, 500 000 000 ՀՀ դրամի արտադրանքը՝ ԵՏՄ անդամ երկրների տարածքում, 7 500 000 000 ՀՀ դրամի արտադրանքը՝ երրորդ երկրների տարածքում։

Արտոնություն ստանալու համար ներկայացված ապրանքների արժեքը կազմում է 8 254 510 000 ՀՀ դրամ: Մաքսատուրքի ազատման արտոնությունը կազմում է 822 983 900 ՀՀ դրամ:

Ներմուծվող ապրանքները չեն ներմուծվում ԵՏՄ անդամ-երկրներից, քանի որ չեն բավարարում ընկերության տեխնիկական պահանջները։

Մանրամասները՝ տեսանյութում։