13.10.2026 | 16:16
Զինված ուժերում կանայք դեռևս քիչ են ներկայացված որոշումների կայացման մակարդակում․ ՄԻՊ
Երեւանի աղբահանության հիմնարկը բանվորների դեֆիցիտ ունի, անգամ 200․000 աշխատավարձով դիմողները քիչ են
Հասարակություն
07.08.2019 | 14:45
«Երեւանի աղբահանության եւ սանիտարական մաքրում» համայնքային ոչ առեւտրային կազմակերպությունը բանվորներով համալրվում է շատ դժվարությամբ: ՀՈԱԿ-ի տնօրեն Արմեն Գրիգորյանը Factor.am-ին փոխանցեց, որ բանվորների դեֆիցիտ կա:
«Այս պահին ունենք 12 աղբատար ավտոմեքենա, որոնք երկու հերթափոխի համար ունեն 24 վարորդ եւ 48 բանվոր: Բանվորների մոտ սեզոնային աշխատանքի խնդիր կա, քանի որ բերքահավաքի սեզոնին գնում են դաշտերում միրգ հավաքելու, դրա համար բանվորները սակավ են, դիֆիցիտ կա: Մարդ կա, որ գալիս երկու ժամ է աշխատում եւ ասում է, որ սա իմ գործը չի եւ հեռանում է, բայց այդ երկու ժամվա համար էլ վարձատրվում է: Եթե հիմա կարող էի, օրինակ, ունենալ 15 բանվոր, ունեմ 10-ը, բայց իմ պահանջներն ամբողջովին բավարարվում է»,- ասաց ՀՈԱԿ-ի տնօրենը:
Արմեն Գրիգորյանը զարմացած է, մեզ հետ զրույցում նշեց, որ թեեւ բանվորներին առաջարկվում է 200 հազար դրամ աշխատավարձ եւ պարգեւավճարներ, բայց աշխատանքի համար դիմողները քիչ են: «Ինձ թվում էր, որ այս բարձր աշխատավարձը կշահագրգռի, էն, ինչ-որ մարդ բիսեդկայում նպաստով ապրում է, կգար եւ կաշխատեր»:
Հավելենք, որ աղբատար մեքենաների վարորդներին առաջարկում են 290 հազար դրամ աշխատավարձ և պարգևավճարներ։
«Երեւանի աղբահանության եւ սանիտարական մաքրում» համայնքային ոչ առեւտրային կազմակերպության տնօրենն ասում է, որ բանվորների աշխատանքի ընդունելու նպատակով պաշտոնապես դիմել է զբաղվածության կենտրոններին եւ գյուղական համայնքերին: Մինչ օրս գյուղական համայնքներից որեւէ մեկը բանվոր աշխատելու ցանկություն չի հայտնել: Արմեն Գրիգորյանը Factor.am-ին ասաց, որ փոխարենն այլազգիներ՝ հիմնականում հնդիկներ կան, որոնք բանվոր են աշխատում ՀՈԱԿ-ում: Նրանց թիվը չի գերազանցում հինգ-վեց հոգին:
Նշենք, որ այս պահին «Երեւանի աղբահանության եւ սանիտրական մաքրում» համայնքային ոչ առեւտրային կազմակերպությունն ունի 90 աշխատակից: Երեւանի ավագանու կողմից ընդունված որոշման համաձայն հաստիքացուցակում առկա է 424 հաստիք:
Նարեկ Կիրակոսյան
