06.08.2026 | 00:46
«Մուլտի գրուպ» կոնցեռնի նախկին տնօրեն Սեդրակ Առուստամյանը 2 ամսով կալանավորվեց
Թուրքիայի ԱԳՆ-ի խոսնակը սպառնացել է ԱՄՆ-ին
Քաղաքականություն
02.08.2019 | 21:04
Թուրքիայի արտգործնախարարության խոսնակ Համի Աքսոյը մամուլի ասուլիսի ժամանակ անդրադարձել է Սիրիայի հյուսիսում ստեղծվելիք անվտանգության գոտու հարցում թուրք-ամերիկյան հակասություններին. գրում է ermenihaber-ը:
Թուրք պաշտոնյան նախ հիշեցրել է, որ վերջերս Թուրքիա էր այցելել Սիրիայում ԱՄՆ-ի հատուկ ներկայացուցիչ Ջեյմս Ջեֆրին, որի ընթացքում ամերիկյան կողմին ներկայացվել էին մի շարք պահանջներ։
Դրանցից մեկն այն է, որ Սիրիայում ստեղծվելիք անվտանգության գոտին ունենա 32 կմ խորություն և այն վերահսկվի Թուրքիայի կողմից, իսկ Սիրիայի քրդական ուժերը այդ տարածքից դուրս գան։
Անկարան Սիրիայի քրդական ուժերին համարում է ահաբեկչական կառույցներ։
Աքսոյը տեղեկացրել է, որ օգոստոսի 5-ին Թուրքիա է այցելելու զինվորական պատվիրակություն ԱՄՆ-ից, որի ընթացքում խոսվելու է անվտանգության գոտու մանրամասների մասին։
«Եթե ԱՄՆ-ի հետ ընդհանուր հայտարարի չգանք, մենք ստիպված կլինենք անվտանգության գոտին միայնակ ստեղծել։ Մենք տարբեր մակարդակներով այդ մասին հայտնում ենք մեր ամերիկյան գործընկերներին»,- ասել է Աքսոյը։
Ավելի վաղ Ջեյմս Ջեֆրին հայտարարել էր, որ անվտանգության գոտու պայմանների վերաբերյալ Թուրքիան և ԱՄՆ-ն ունեն անհամաձայնություններ։ Ամերիկյան կողմի համար, ընդունելի տարբերակ է միայն այն, որ գոտին ունենա 5-14 կմ խորություն։
Հակասություններ կան նաև այդ տարածքներից Սիրիայի քրդական ուժերի դուրս բերման հարցերում։
